![](img/news/03/31/81/default.jpg)
Թուրքիայի «Ազգայնական շարժում» կուսակցության անդամների կողմից Անիի Մայր տաճարում նամազ անելու թույլտվություն տալը քաղաքական նպատակներ ուներ, որի իմաստը «Ազգայնական շարժմանը» որոշակի քաղաքական դիվիդենտներից զրկելն էր: Այս մասին NEWS.am-ի թղթակցի հետ զրույցում ասաց քաղաքագետ Երվանդ Բոզոյանը: Նա ընդգծեց, որ առաջիկայում Թուրքիայում ընտրություններ են սպասվում, եւ բնական է, որ ակտիվացել են քաղաքական բոլոր ուժերը:
«Նրանց մի մասն իր քաղաքական ակտիվությունը դրսեւորում է՝ վարչապետ Էրդողանին մեղադրելով միջազգային հանրության հետ «խաղեր տալու» եւ հայկական գործոնը ուժեղացնելու մեջ, ու որպես օրինակ շեշտում Սուրբ խաչ եկեղեցում պատարագի թույլտվություն տալու թուրքական կառավարության որոշումը»,- ասաց քաղաքագետն ու հավելեց. «Ազգայնական շրջանակները Թուրքիայի ներսում փորձում են սա օգտագործել որպես թույլ քայլ, որով իբր սիրաշահում են Հայաստանին: Եվ պատահական չէ, որ որոշ ուժեր ամպագորգոռ հայտարարություններ արեցին, նշելով, թե Էրդողանը խրախուսում է Արեւելյան Թուրքիայի քրիստոնեականացումը եւ այլն եւ այլն»:
Ինչ վերաբերում է նամազի թույլտվություն տալուն, ապա, ըստ փորձագետի, կառավարությունը չկարողացավ այդ հարցում մերժել ազգայնականներին, վախենալով, որ «Ազգայնական շարժումը» կարող է որոշակի դիվիդենտներ շահել՝ մատնացույց անելով ազգայնական որոշակի հարցերում թուրքական իշխանությունների «թուլությունները», ինչի հետեւանքով իշխող կուսակցությունը կարող էր որոշակի ակցիաներ կորցնել:
Ամփոփելով՝ Բոզոյանը նշեց, որ նամազ անելու եւ Սուրբ Խաչ եկեղեցում պատարագ մատուցելու թույլտվություն տալով՝ Թուրքիան չբարձրացրեց իր միջազգային վարկանիշը, քանի որ ակնհայտ է, որ այդ քայլերը զուտ քարոզչական նպատակ ունեին եւ հետապնդում էին ներպետական շահեր: