Թուրքիայի նախագահ Ռեջեփ Թայիփ Էրդողանի՝ ՌԴ նախագահ Վլադիմիր Պուտինին ուղղված շնորհավորական նամակը արձանագրային ուղերձ է, որը պատասխան չի պահանջում։ Այս մասին ասել է ՌԴ նախագահի մամուլի խոսնակ Դմիտրի Պեսկովը, փոխանցում է «ՌԻԱ Նովոստի»–ն։
«Դա արձանագրային ուղերձ է, ազգային տոների կապակցությամբ ավանդաբար տեղի է ունենում նման ուղերձների փոխանակում։ Դա միջազգային հարաբերություններում սովորական պրակտիկա է։ Որպես կանոն՝ նման ուղերձները չեն պահանջում որեւէ պատասխան։ Որեւէ այլ բովանդակային պահ, ցավոք, ուղերձում չկար»,– ասել է Պեսկովը։
Պեսկովը նշել է, որ երբեմն նամակները շարունակում են գալ, երբեմն՝ ոչ. դա իրավիճակից է կախված։ «Այս տարի ստացվել է նամակ, բայց դա մեր օդանավի վրա հարձակումից հետո առաջին ազգային տոնն էր»,– ասել է նա եւ նշել, որ Մոսկվան ուզում է կարգավորել հարաբերությունները Անկարայի հետ, բայց առանց Թուրքիայի կողմից որոշ գործողությունների, դա անհնար է։
