Միակ կոնկրետ առաջարկը, որը կա Ղարաբաղի հարցով բանակցությունների սեղանին, հետեւյալն է. հայկական կողմը Ադրբեջանին է վերադարձնում տարածքներ՝ Լեռնային Ղարաբաղի ինչ–որ կարգավիճակի դիմաց։ Այս մասինNEWS.am–ի թղթակցի հետ զրույցում ասել է ռուսաստանցի քաղաքագետ Ալեքսանդր Խրամչիխինը։

Անդրադառնալով ԵԱՀԿ ՄԽ ամերիկացի համանախագահ Ջեյմս Ուորլիքի հայտարարությանը, թե Հայաստանի եւ Ադրբեջանի նախագահներն աշխատում են շատ լուրջ աշխատանքային առաջարկների վրա, քաղաքագետը նշեց. «Ես չգիտեմ, թե ինչ առաջարկ է դա, եւ ինձ համար շատ դժվար է ենթադրել, եթե միայն նույն առաջարկի կրկնությունը չէ, որի համաձայն՝ հայկական կողմը տարածքներ  է վերադարձնում Ադրբեջանին Լեռնային Ղարաբաղի ինչ–որ կարգավիճակի դիմաց, որին պետք է ակնհայտորեն համաձայնի Ադրբեջանը։

Բայց ես կարծում եմ, որ դա ինքնիշխանության ինչ–որ բարձր աստիճանով կարգավիճակ է, թեպետ ոչ ոք չի ասել, որ Ադրբեջանը համաձայն է անգամ ինքնավարության ցածր մակարդակի։ Ես չեմ կարող պատկերացնել, որ հայկական կողմը կամավոր համաձայնի դրան»։

Դա ռուսաստանցի քաղաքագետին հայտնի միակ կոնկրետ առաջարկն է, որը փոխզիջումնային է համարվում։ «Բայց իրականում տարբեր պատճառներով այն ձեռք չի տալիս ո՛չ Հայաստանին, ո՛չ Ադրբեջանին։ Այլ առաջարկների մասին ես չգիտեմ, եւ ինձ համար դժվար է ենթադրել, թե ուրիշ ինչ կարելի է մտածել։ Ինչպես ես բազմիցս ասել եմ, կողմերի դիրքորոշումները փոխադարձ բացառող են»,– ընդգծել է Խրամչիխինը։