![](img/news/33/48/02/default.jpg)
Հայաստանի Ազգային ժողովն այսօր՝ հունիսի 30-ին, երկրորդ ընթերցմամբ եւ ամբողջությամբ ընդունել է Ընտրական օրենսգրքի փոփոխությունների մասին օրենքի նախագիծը:
Նախագծին կողմ է քվեարկել 104 պատգամավոր, դեմ՝ 5, ձեռնպահ՝ 2: Նշենք, որ առաջին ընթերցմամբ նախագիծն ընդունվել է 106 կողմ, 6 դեմ ձայներով:
Նշենք, որ այս փոփոխություններով նախատեսվում է տեսանկարահանում իրականացնել տեղամասերում, ուղիղ հեռարձակում ապահովել, ինչպես նաեւ նախապես գրանցել ընտրողներին՝ նույնականացման քարտեր տրամադրելու համար մատնահետքեր վերցնելով: Այս փոփոխությունները կյանքի կկոչվեն, եթե միջազգային կառույցները ֆինանսավորեն: Միայն նախագրանցման համար անհրաժեշտ է 16 մլն եվրո, որի 11.5 մլն-ը դոնոր կազմակերպությունները պատրաստ են տրամադրել: Մնացած 4.5 մլն եվրոն ընդդիմությունը պահանջում է իշխանություններից, որոնք, սակայն, պնդում են՝ բյուջեում դրա համար նախատեսված գումար չկա: