«ՌԻԱ Նովոստի» ռուսական լրատվական գործակալության թղթակից Դմիտրի Վինոգրադովին արգելել են մտնել Թուրքիա։ Լրագրողին Ստամբուլի Սաբիհի Գյոքչենի անվան օդանավակայանում սահմանապահներն ասել են, որ նրա անունը ներառված է այն անձանց ցուցակում, որոնց մուտքը Թուրքիա արգելված է։ Ընդ որում, փաստաթղթում, որը տվել են Վինոգրադովին, նշված չէ պատճառը, թե ինչու է նա հայտնվել այդ ցուցակում։
«Ես ժամանել էի ահաբեկչության հետեւանքները լուսաբանելու համար։ Ինձ կանգնեցրեցին սահմանին, սկսեցին ոստիկանների սենյակներով տանել, հետո ասացին, որ իմ մուտքը Թուրքիա արգելված է։ Ոչ մի պատճառ չնշեցին»,– ասել է Վինոգրադովը ՌԲԿ–ին։ «Ես սահմանապահներին ոչինչ չեմ ասել, նրանք ստուգեցին իմ անձնագիրը եւ իմ մասին իրենց բազայում տեղեկություններ տեսան»,– ասել է նա։
Միայն դրանից հետո նա ասել է, որ լրագրող է, թեպետ նրանք դա առանց այդ էլ գիտեին։ Լրագրողի խոսքով՝ ինքը բազմիցս եղել է Սիրիայում, Թուրքիայում եւ Իրաքում։