![](img/news/33/54/25/default.jpg)
Ռուսաստանի եւ Թուրքիայի հարաբերությունների մերձեցումը վտանգավոր է Հայաստանի համար: Այս մասին այսօր՝ հուլիսի 4-ին, լրագրողների հետ հանդիպմանն ասաց «Մոդուս վիվենդի» կենտրոնի տնօրեն Արա Պապյանը:
«Երկու պետությունները մեկուսացված էին եւ ձգտեցին մերձենալ: Մեզ համար վտանգներ է պարունակում սա, քանի որ գիտենք՝ Ռուսաստանի քաղաքականությունն է սիրաշահելը, իսկ սիրաշահելու համար ինչ-որ բան պիտի տաս կամ զիջես: Այն, որ Պուտինն ուզում է Թուրքիայի հետ հարաբերությունները լավացնել, ակնհայտ է: Դա երեւաց նաեւ այն հայտնի նամակում, որտեղ Թուրքիան ներողություն չէր խնդրել, մինչդեռ ռուսական կողմը ներկայացրեց՝ որպես ներողություն»,- ասաց Արա Պապյանը:
Ըստ Պապյանի՝ Թուրքիան այսօր վտանգավոր խաղ է խաղում, որն ամենայն հավանականությամբ չի աշխատելու, քանի որ Արեւմուտքը կարող է այնտեղ ստեղծել քրդական պետություն եւ այսպես լուծել հարցը: Մինչդեռ Ռուսաստանի հետ այս մերձեցումը վտանգավոր է նաեւ Հայաստանի համար, երբ զիջման տարբերակն Արցախն է՝ լավրովյան ծրագիրը, որը վտանգավոր տարրեր է պարունակում: Ավելին, երբ տարածքներ են զիջում ոչ թե Արցախի կարգավիճակի դիմաց, այլ անհասկանալի ինչ-որ կարգավիճակի, դա անթույլատրելի է. «Նշաններ կան, որ իշխանություններն ուզում են գնալ այդ տարբերակին: Կանեն դա, թե չէ, այլ հարց է, քանի որ հասարակությունը դա չի ուզում: Թղթի դիմաց զիջել գոյություն ունեցող քիչ թե շատ կայուն վիճակը, սխալ է»:
Հայկական կողմը Արա Պապյանի պնդմամբ, պետք է սկզբունքորեն դեմ լինի որեւէ տարածքի զիջման: