Թուրքական բանջարեղենի մատակարարումների վերականգնման ուղղությամբ ոչ մի որոշում դեռ չի կայացվել, հարցը քննարկվելու է Անկարայի հետ, բայց դա չի նշանակում, որ Ռուսաստանը անմիջապես «վազել ու ամեն ինչ բացել է»: Այս մասին հայտնել է ՌԴ վարչապետ Դմիտրի Մեդվեդեւը, փոխանցում է «ՌԻԱ Նովոստին»:
Մերձմոսկվայում «Մատվեեւսկոյե» գյուղատնտեսական ձեռնարկությունների ջերմոցային համալիրում, որտեղ վարունգ ու լոլիկ են աճեցնում, վարչապետի կատարած այցի ժամանկ մտավախություններ են հնչել, որ թուրքական լոլիկը նորից կարող է շուկայից դուրս մղել ռուսականը:
«Ոչ մի որոշում չի կայացվել, կքննարկենք դա մեր թուրք գործընկերների հետ ՝ ինչ եւ ինչպես, բայց դա չի նշանակում, որ մենք միանգամից վազելու ենք ու բացենք ամեն ինչ: Միայն մեկ որոշում է կայացվել՝ զբոսաշրջային երթուղիների վերաբերյալ»,- ասել է վարչապետը:
Ռուսաստանը 2016-ի հունվարի 1-ից արգելել է Թուրքիայից մրգերի ու բանջարեղենի որոշ տեսակների, նաեւ մսի ու հավի եւ հնդուհավի ենթամթերքների ներկրումը:
Ռուսաստանի նախագահ Վլադիմիր Պուտինը հունիսի 30-ին ստորագրել է հրաման, որը փոխում է հատուկ միջոցառումները Թուրքիայի նկատմամբ: Ուղղակիորեն չեղարկվել են սահմանափակումները զբոսաշրջային ոլորտի նկատմամբ: Հրամանի մնացած կետերը դեռ ուժի մեջ են մնում, սակայն կառավարությանը հանձնարարվել է բանակցություններ վարել թուրքական կողմի հետ ու դրանց արդյունքներով առաջարկներ անել հատուկ միջոցառումների ժամկետների կամ բնույթի փոփոխությունների վերաբերյալ:
