Այսօր՝ հոկտեմբերի 7-ին Ստամբուլի Բեյօղլու թաղամասում գտնվող հայկական Սուրբ Հարություն եկեղեցին վերանորոգումից հետո բացեց իր դռները հավատացյալների առաջ։
Ստամբուլի Շիշլիի համայնքապետարանի միջոցներով վերանորոգված եկեղեցու վերաբացմանը մասնակցել են Շիշլիի համայնքի վարչական ղեկավար Մուսթաֆա Սարըգյուլը, Պոլսո Հայոց պատրիարքական ընդհանուր փոխանորդ արք. Արամ Աթեշյանը եւ այլոք։
Մուսթաֆա Սարըգյուլը ելույթ է ունեցել հայկական եկեղեցու բացմանը՝ նշելով, թե իրենց նպատակն է ապահովել բոլոր քաղաքացիների կրոնական ազատությունները՝ առանց տարբերակելու ազգային, կրոնական եւ մշակույթային առանձնահատկությունները։ «Թող այս եկեղեցում աշխարհի խաղաղության համար կատարվելիք աղոթքները ընդունելի լինեն»,-նշել է Շիշլիի վարչական ղեկավարը։
Մուսթաֆա Սարըգյուլը հայտնել է, թե Ս. Հարություն եկեղեցու վերանորոգման համար համայնքի բյուջեից ծախսվել է մոտ 150 հազար ԱՄՆ դոլար։