Անցած գիշերը Խորենացի փողոցում ամենալարվածն էր: Ամեն օրվա պես ժամը 18:30-ից ցուցարարները ՊՊԾ գնդի տարածքում էին՝ այս կերպ իրենց աջակցությունը հայտնելով զինված խմբին: Ժամը 21:30-ի սահմաններում իրավիճակը սրվեց, երբ ցուցարարների շրջանում տեղեկություններ տարածվեցին, թե «Սասնա ծռեր» խմբի անդամներն առանց սննդի են մնացել: Պատգամավոր Նիկոլ Փաշինյանը խոստացավ Սարի թաղից վերադառնալուն պես բանակցել ոստիկանների հետ եւ սնունդ հասցնել զինված խմբին: Ցուցարարները սակայն չսպասեցին եւ հարձակվեցին ոստիկանների վրա՝ քարեր եւ ապակյա շշեր նետելով նրանց ուղղությամբ: «Մարտի 1»-ից հետո առաջին անգամ ոստիկանությունն աղմկարար նռնակներ եւ արցունքաբեր գազ օգտագործեց:

Մի քանի րոպեից քաղաքացիները կրկին վերադարձան եւ բարիկադներ կառուցեցին, փակվեց նաեւ Տիգրան Մեծ պողոտան: Մի քանի ժամ սպասելուց հետո ոստիկանությունը ժամանակ տվեց ցուցարարներին՝ ճանապարհը բացելու համար: Ցուցարարները չկատարեցին պահանջը եւ ոստիկանությունը մեկ գիշերվա ընթացքում երկրորդ անգամ ցրեց ցույցը՝ բռնությամբ բերման ենթարկելով այնտեղ մնացած գրեթե բոլոր քաղաքացիներին, այդ թվում, «Քաղաքացիական պայմանագիր» կուսակցության վարչության անդամներին: Բռնության ենթարկվեցին նաեւ տեղում աշխատող լրագրողներ: Հաշվված րոպեների ընթացքում Խորենացի, Նար- Դոս փողոցներում եւ Տիգրան Մեծ պողոտայում ցուցարար չմնաց: Դրանից հետո էլ փողոցը դեռ մի քանի ժամ փակ մնաց. այնտեղ քննչական գործողություններ իրականացվեցին:

Առավոտյան ոստիկանությունը հաղորդեց, որ բերման է ենթարկվել 136 ցուցարար: Գիշերը տեղի ունեցածը Քննչական կոմիտեն որակեց զանգվածային անկարգություն: Դեպքի առթիվ քրգործ հարուցվեց, բերման ենթարկվածներից 16-ը ձերբակալվեց:

Գիշերը տեղի ունեցած բախումների հետեւանքով 51 տուժած է դիմել մայրաքաղաքի հիվանդանոցներ: Նրանցից 28-ը ոստիկաններ են: Տուժածներից 34-ը հոսպիտալացվել է: Տուժածները հիմնականում ստացել են քերծվածքներ, սալջարդեր, գազից թունավորումներ: Մի քանիսը վնասվածքներ են ստացել գլխի շրջանում:

Օրվա ընթացքում շատերը դուրս են գրվել: Այս պահի դրությամբ հիվանդանոցներում են գտնվում 11 տուժած, նրանցից 4-ը ոստիկաններ են: Ոչ մեկի կյանքին վտանգ չի սպառնում:

Ոստիկանության ՊՊԾ գունդը գրավելուց ավելի քան 100 ժամ անց վերջապես իրադարձություններին գնահատական տվեց իշխանության ներկայացուցիչը: Կառավարության նիստի հենց սկզբում Հովիկ Աբրահամյանը մեկնաբանեց զինված խմբի հարձակումից հետո երկրում առաջացած իրավիճակը: 

Վարչապետը նշեց, որ բռնությամբ անհնար է հասնել իրական փոփոխությունների, ավելին, կատարվող իրադարձությունները վտանգավոր են եւ անհեռանկար: Գործադիր մարմնի ղեկավարը նաեւ ցավակցեց հարձակման հետեւանքով սպանված գնդապետի հարազատներին եւ ընկերներին:

Նիստից հետո էլ լրագրողները փորձեցին մեկնաբանություններ ստանալ Կառավարության մյուս ներկայացուցիչներից: Նախարարներից միայն Արծվիկ Մինասյանն ու Արմեն Մուրադյանը դուրս եկան այնտեղով, որտեղ լրագրողներն էին կանգնած:

Անդրադառնալով նախօրեին տեղի ունեցած բախումներին՝ դաշնակցական նախարարը բարձր գնահատեց ոստիկանության հանդուրժողականության մակարդակը՝  չբացառելով, որ առանձին դրվագներում եղել են ոչ իրավաչափ վարքագիծ եւ ոչ համաչափ դրսեւորում:

Առողջապահության նախարարն էլ լրագրողներին հավաստիացրեց, որ եթե բուժօգնության անհրաժեշտություն լինի, բժիշկներն անարգել կմտնեն ՊՊԾ գնդի տարածք: Նշենք, որ երեկվանից տեղեկություններ են շրջանառվում, թե զինված խմբի անդամները մնացել են առանց սննդի եւ դեղորայքի: 

Կեսօրին մամուլում լուրեր շրջանառվեցին, որ զինված խմբի անդամների հետ բանակցություններին մասնակցում են արցախցի պատգամավոր Վիտալի Բալասանյանն ու Արցախի թեմի առաջնորդ Պարգև Արքեպիսկոպոս Մարտիրոսյանը: Թե ինչ են քննարկել, հայտնի չէ:

Հայաստանյան իրադարձություններին այսօր արձագանքել է նաեւ միջազգային հանրությունը: Եվրոպական միության պատվիրակությունը՝ Հայաստանում հավատարմագրված ԵՄ անդամ պետությունների դիվանագիտական առաքելությունների ղեկավարների համաձայնությամբ հայտարարություն է տարածել, որում ասվում է. «Իշխանություններին կոչ ենք անում հարգել համաչափության սկզբունքը խաղաղ բնույթի, ինչպես նաեւ բռնությամբ ուղեկցվող հանրային բողոքի ակցիաների առնչությամբ: Միաժամանակ, ցուցարարներին անհրաժեշտ է ձեռնպահ մնալ բռնի գործողություններից՝ իրենց քաղաքացիական իրավունքների իրացման ընթացքում»: 

Հայաստանում Ֆրանսիայի արտակարգ եւ լիազոր դեսպանն էլ հերթին հույս է հայտնել, որ Երեւանում այս օրերին տեղի ունեցող իրադարձությունները կհանգուցալուծվեն արագ եւ խաղաղ: 

Ի տարբերություն գործընկերների, պաշտոնական Մոսկվան հայտարարել է, որ դատապարտում է Երեւանում ոստիկանության շենքի զինված գրավումը ու աջակցում Հայաստանի իշխանությունների ձեռնարկած քայլերին:

«Հույս ունենք, որ դրանք թույլ կտան ամենամոտ ժամանակներում հանգուցալուծել իրավիճակը, ազատ արձակել պատանդներին, միջադեպի սպառիչ հետաքննություն անցկացնել ու պատժել մեղավորներին»,- ասել է Ռուսաստանի ԱԳՆ պաշտոնական ներկայացուցիչ Մարիա Զախարովան:

Վրաստանում նախօրեին Հայաստանի քաղաքացի է խեղդվել: Մովսես Առաքելյանը խեղդվել է Աջարիայում: 40-ամյա տղամարդը Երեւանի բնակիչ էր, Վրաստան էր մեկնել ընտանիքի հետ հանգստանալու նպատակով:

Նրա մարմինը դեռ չեն տեղափոխել Հայաստան:

Նախօրեին կրակոցներ են հնչել Մալաթիա- Սեբաստիա համայնքում գտնվող հացատներից մեկում, երկու տղամարդ հրազենային վնասվածքով տեղափոխվել է հիվանդանոց: Նախնական տեղեկություններով, վիճաբանության ժամանակ Ռոբերտ Ավետիսյանը կրակել է 50-ամյա Ռուբեն Կոստանյանի ուղղությամբ եւ վիրավորել նրան: Դեպքի վայր ժամանած ոստիկանները ստիպված են եղել վնասազերծել Ավետիսյանին՝ կրակելով նրա ոտքին, քանի որ տղամարդը շարունակել է կրակել: Լրատվամիջոցների հաղորդմամբ, Ռուբեն Կոստանյանը գործարար պատգամավոր Սամվել Ալեքսանյանի մտերիմ ընկերն է:

Կատարվում է քննություն:

Դոլարն ու ռուբլին աննշան էժանացել են, իսկ եվրո ու ֆունտը՝ հակառակը՝ թանկացել: Դոլարի փոխարժեքը կազմել է 476, ռուբլունը՝ 7.45, եվրոյինը՝ 524, ֆունտինը՝ 628 դրամ: 

Երեւանում հուլիսի 22-ին սպասվում է առանց տեղումների եղանակ: Առաջիկա գիշերը մայրաքաղաքում կլինի +23+25, իսկ վաղը ցերեկը՝ +37+39 աստիճան տաքություն։  Ուլտրամանուշակագույն ճառագայթման ինտենսիվությունը դարձյալ  նորմայից բարձր կլինի: