Թուրքիայի հետ հարաբերությունների վերականգնման եւ Սիրիայի իրավիճակի հարցերը կբարձրացվեն ՌԴ եւ Թուրքիայի նախագահներ Վլադիմիր Պուտինի եւ ՌԵջեփ Թայիփ Էրդողանի հանդիպմանը, հայտարարել է ՌԴ նախագահի մամուլի քարտուղար Դմիտրի Պեսկովը:
Նրա խոսքով՝ մտքերի լուրջ փոխանակում է սպասվում այն կապակցությամբ, թե «ինչ տեմպերով եւ հետեւողականությամբ կզբաղվենք մեր հարաբերությունների վերականգնմամբ»: «Կան տնտեսական գործունեության հետ կապված ընթացիկ հարցեր, իհարկե՝ կարելի է համարձակորեն կանխատեսել, որ մտքերի համանման փոխանակում կկատարվի նաեւ տարածաշրջանային հարցերի՝ ներառյալ Սիրիայի հարցի հետ կապված»,- լրագրողներին ասել է Պեսկովը:
Նրա խոսքով՝ հանդիպման օրակարգը հեշտ է կանխատեսել: «Գիտեք, որ հայտնի միջադեպից՝ ռուսական ինքնաթիռի ողբերգությունից առաջ Ռուսաստանին եւ Թուրքիային միավորում էր ընդլայնված գործընկերությունը: Աշխատանք էր ընթանում համալիր թեմաների շուրջ՝ առեւտրատնտեսական եւ ներդրումային համագործակցության պլանում: Առկա էր բավական հագեցած քաղաքական երկխոսություն»,- «ՌԻԱ Նովոստի»-ի փոխանցմամբ՝ ասել է Պեսկովը: