Ռուսաստանի Պաշտպանության նախարարությունը կարող է Թուրքիային առաջարկել երկու երկրի զինվորականների միջեւ կապուղիներ ստեղծել` ապագայում խուսափելու համար այնպիսի միջադեպերից, ինչպիսին էր 2015-ի նոյեմբերին Սու-24 ռմբակոծիչի խոցումը: Այդ մասին երկուշաբթի օգոստոսի 8-ին հայտնել է «Իզվեստիան»` վկայակոչելով պաշտպանական գերատեսչությունում իրազեկված աղբյուրին
Պարբերականի զրուցակցի խոսքով, փաստաթղթերի համապատասխան փաթեթն արդեն ձեւավորվել է եւ կուղարկվի Անկարա, եթե երեքշաբթի` օգոստոսի 9-ին Սանկտ Պետերբուրգում Ռուսաստանի եւ Թուրքիայի նախագահների բանակցությունների ընթացքում սկզբունքային որոշում կայացվի:
«Պաշտպանության նախարարությունն արդեն թուրքական կողմի համար առաջարկների փաթեթ է նախապատրաստել, որը, ի թիվս այլ բաների, ներառում է երկու երկրի զինվորականների միջեւ տեղեկատվության փոխանակում, ինչպես նաեւ օդում գործողությունների ընթացակարգեր», - աղբյուրի խոսքերն է մեջբերում պարբերականը:
Ռուսաստանյան ռազմական գերատեսչության փաստաթղթերը նախատեսում են նաեւ օդաչուների համար հրահանգների օգտագործում այն մասին, թե ինչպես է անհրաժեշտ գործել վտանգավոր իրավիճակում` խուսափելու համար անցած տարվա ողբերգությունից, պարզաբանել է պարբերականի աղբյուրը: