«Իսլամական պետություն»-ը համացանցում տեսահոլովակ է հրապարակել, որում 5 տղաներ սպանում են Սիրիայում գերեվարած քուրդ աշխարհազորայինների: Ինչպես պնդել են ջիհադականները, հոլովակում երեւացող տղաներից մեկը Մեծ Բրիտանիայից է:
Տղաներն արտաքուստ 10-ից 13 տարեկան են: Մեծ Բրիտանիայի արտգործնախարարությունում դեռեւս չեն մեկնաբանել ջիհադականների այն պնդումները, որ երեխաներից մեկ Բրիտանիայի քաղաքացի է:
Տեսահոլովակում երեխաները ռազմական հանդերձանքով են, իսկ գերյալները՝ նարնջագույն բանտային համազգեստով, փոխանցում է BBC-ն:
Երեխաներից մեկը, ում անունը Աբու ալ-Բարա ալ-Թունիս է (Թունիսից է), քրդերին արաբերեն է դիմում եւ էլ ավելի մեծ արյունահեղություն է խոստանում: Նրա խոսքով՝ քրդերի դեմ պայքարը նույնիսկ դեռ չի սկսվել: Մյուս տղաներին հոլովակում դիմում են Աբու Իսահակ ալ-Մարսի (Եգիպտոսից է), Աբու Աբդուլլահ ալ_Բրիտանի (Բրիտանիայից է), Աբու Ֆուադ ալ-Քուրդի (քուրդ է) եւ Յուսուֆ ալ-Ուզբակի (ուզբեկ է) անուններով: