Անկարայում դժգոհ են ԵՄ-ի թվային տնտեսության եւ հասարակության հարցերով հանձնակատար Գյունտեր Էտտինգերի` Եվրոպայում թուրքական հեռանկարներին վերաբերող հայտարարությունից: Թուրքիայի ԵՄ-ի հարցերով նախարար Օմեր Չելիկը գերմանացի քաղաքական գործչի հայտարարությունները «մշակութային ռասիզմ» է կոչել:
Նախօրեին Bild թերթում Էտտինգերի հետ հարցազրույց էր հրապարակվել, որում եվրոհանձնակատարը մեծ կասկածներ էր հայտնել ինչպես Թուրքիայի` ԵՄ-ին շուտափույթ անդամակցման, այնպես էլ այդ երկրի եւ Շենգենի համաձայնագրի մասնակից երկրների միջեւ վիզայի ռեժիմը չեղյալ հայտարարելու վերաբերյալ: Մասնավորապես, Գերմանիայից եվրահանձնակատարը նշել էր, որ Եվրոպային Թուրքիայի ինտեգրացիայի հարցերը այժմեական կլինեն միայն Թուրքիայի նախագահ Ռեջեփ Թայյիփ Էրդողանի հեռացումից հետո, հայտնում է DW-ն:
Եվրամիության եւ Թուրքիայի միջեւ հարաբերությունները սրվել են այն բանից հետո, երբ Անկարան զանգվածային բռնաճնշումներով է արձագանքել երկրում ռազմական հեղաշրջման փորձին: Հեղաշրջման փորձին աջակցության կասկածով հազարավոր մարդիկ են ձերբակալվել, տասնյակ հազարավորներ կորցրել են աշխատանքը:
