Ղարաբաղյան կարգավորման հարցում Ռուսաստանի առաջատար դերը դրական չի լինի հայկական կողմերի համար: Այս մասին սեպտեմբերի 1-ի մամուլի ասուլիսի ժամանակ ասել է դիվանագետ, Մոդու Վիվենդի վերլուծական կենտրոնի ղեկավար Արա Պապյանը:
Նրա խոսքով Ռուսաստանը ԵԱՀԿ Մինսկի խմբի միակ համանախագահ երկիրն է, որը զենք է վաճառում հակամարտության կողմերին: «Լինելով Հայաստանի դաշնակիցը, Ռուսաստանը զենք է վաճառում իր դաշնակցի հակառակորդին: Դա համաշխարհային պատմության մեջ չլսված երեւույթ է»- շեշտել է Արա Պապյանը: Բնականաբար, շարունակեց նա, մեզ համար Ռուսաստանի առաջատար դերը դրական չի լինի, հաշվի առնելով, որ Ադրբեջանի ազդեցությունը Ռուսաստանի վրա աստիճանաբար աճում է, մանավանդ Ռուսաստանի, Իրանի ու Ադրբեջանի նախագահներ՝ Վլադիմիր Պուտինի, Հասան Ռոհանիի ու Իլհամ Ալիեւի՝ Բաքվում օգոստոսի 8-ին կայացած հանդիպումից ու երկաթգծի մասին ձեռքբերված պայմանավորվածությունից հետո:
«Մեզ համար դրական կլիներ հնարավորինս շատ դերակատարների ներգրավվածությունը, քան որ մենք կկարողանայինք օգտագործել նրանց միջև տարաձայնությունները, հավասարակշռություն պահպանել ու ճիշտ քաղաքականության դեպքում որեւէ դրական արդյունքի հասնել»- ամփոփեց Արա Պապյանը:
Հիշեցնենք, որ Ռուսաստանի ԱԳՆ պաշտոնական ներկայացուցիչ Մարիա Զախարովան պատասխանելով լրագրողի այն հարցին արդյոք իրականությանը համապատասխանում է տեղեկությունն այն մասին, որ ԱՄՆ պետքարտուղար Ջոն Քերրին Մոսկվային առաջարկել է առաջատարի դեր ղարաբաղյան կարգավորման գործընթացում՝ Սիրիայի հարցով զիջումների դիմաց, ասել է. «Չեմ հավատում, որ ԱՄՆ –ը որեւէ հարցում հենց այնպես մեզ զիջի առաջատարի դերը: Դա մեծ հաջողություն կլիներ»: