Ոստիկանի նկատմամբ բռնություն գործադրելու մեջ մեղադրվող` «Հիմնադիր խորհրդարանի» անդամ Գեւորգ Սաֆարյանի գործով դատական նիստին այսօր` սեպտեմբերի 27-ին, Գեւորգ Սաֆարյանը հայտարaրեց, որ իր գործով դատական նիստերի հետաձգումը կապված է եղել հուլիսի 17-ին «Սասնա ծռեր» խմբի կողմից ոստիկանության ՊՊԾ գնդի գրավման հետ եւ հենց դա էլ ապացուցում է, որ այս գործը իրավաբանության հետ որեւէ կապ չունի:
«ՊՊԾ գնդի գրավում տեղի ունեցավ եւ ինձ որպես պատանդ պահում էին բանտում, նիստերը հետաձգվում էին: Ինչն էլ ապացուցում է, որ տվյալ գործը իրավաբանության հետ որեւէ կապ չունի, իմ նկատմամբ քաղաքական հետապնդում է իրականացվում: Դատական նիստի օրերը հետաձգվել են այն պատճառով, որ «Սասնա ծռերը» գրավել են ոստիկանության ՊՊԾ գունդը, իսկ գունդը գրավողներն իմ համախոհներն են»,-ասաց նա:
Գեւորգ Սաֆարյանը նշեց, որ դատաքննության ընթացքում դատական նիստերի դահլիճում ոստիկանության աշխատակիցների կողմից տված ցուցմունքները չեն համապատասխանում իրականության հետ, դրանք արժանահավատ չեն:
Գեւորգ Սաֆարյանի հայտարարությունը կիսատ մնաց. դատարանն այն ընդհատեց, քանի որ դատական նիստերի դահլիճում ներկա գտնվողներն, ըստ նրա, խոսում էին եւ խանգարում դատական նիստի ընթացքին:
Նիստը հետաձգվեց, որն էլ առաջացրեց ամբաստանյալ Գեւորգ Սաֆարյանի եւ նիստերի դահլիճում ներկա գտնվողների դժգոհությունը:
Գեւորգ Սաֆարյանին մեղադրանք է առաջադրվել Քրեական օրենսգրքի 316-րդ հոդվածի 1-ին մասով:
Հիշեցնենք, որ Երեւանի Ազատության հրապարակում 2016թ. հունվարի 1-ին ընդդիմադիր «Նոր Հայաստանի» անդամների եւ ոստիկանների միջեւ բախումներ էին տեղի ունեցել: Պատճառը տոնածառի հագուստով մայրաքաղաքի փողոցներում շրջող ակտիվիստն էր: Երեք անձ բերման էր ենթարկել, այդ թվում՝ Գեւորգ Սաֆարյանը, որին հետագայում էլ կալանավորեցին:
Ըստ իրավապահ մարմինների` Գեւորգ Սաֆարյանը բռնություն է գործադրել Ոստիկանության 4-րդ հատուկ գումարտակի հրամանատար, ոստիկանության կապիտան Գեղամ Խաչատրյանի նկատմամբ:
