Մինչեւ տարեվերջ Հայաստանում վերջնականապես կձեւավորվի բանկային համակարգի նոր կերպարը: Այս մասին NEWS.am–ի թղթակցին ասել է Հայաստանի բանկերի միության նախագահ Սամվել Չզմաչյանը՝ խոսելով անկախության 25 տարիների ընթացքում Հայաստանի բանկային համակարգի ձեռքբերումների մասին:
Բանկային համակարգի, ինչպես եւ ինքնիշխանության մյուս կարեւոր ինստիտուտների ձեւավորումը Հայաստանում հարթ չի ընթացել: Ստիպված են եղել անցնել պայթող բանկերի, խաբված ավանդատուների ու «աճի այլ մանկական հիվանդությունների» շարանով:
Քառորդ դար հետո Հայաստանի բանկային համակարգը տասնյակ անգամ ամուր է ու հուսալի, քան 90-ականներին: Կանոնակարգման մակարդակով այն շատ առաջ է տնտեսության մյուս ոլորտներից: «Եվ ո՞վ կարող է հիմա հիշել, թե Հայաստանում երբ է վերջին անգամ բանկ «պայթել», նշեց Չզմաչյանը:
Մինչեւ տարեվերջ երկրում վերջնականապես կձեւավորվի բանկային համակարգի նոր կերպարը,որը բաղկացած կլինի բանկերից, որոնցից յուրաքանչյուրը կունենա ավելի քան 30 մլրդ դրամի չափով նորմատիվային ընդհանուր կապիտալ:
Բանկային հակամարգի մեջ կհոսի լրացուցիչ կապիտալ՝ մոտ 300 մլն դոլարի չափով, որը տնտեսության մեջ կտեղակայվի ու լուրջ ազդակ կդառնա դրա հետագա զարգացման համար: Մեր երկրի համար վարկային ռեսուրսների նման պատկառելի ծավալն, անկասկած, կհանգեցնի վարկային տոկոսադրույքների նվազմանը
«Երկրի բանկային համակարգը միշտ կլինի իրական տնետսության կողքին, իրական մարդկանց հետ՝ օգնելով ու աջակցելով նրանց ավելի լավ ապագա կառուցելու ձգտման մեջ»- ամփոփել է նա:
