Արթիկ քաղաքի 36/7 եւ 36/4 ընտրատեղամասերում քվեարկությանը մասնակցած քաղաքացիների անձնագրերում դրված կնիքների թանաքն անհետանում է: Այս մասին NEWS.am-ին պատմեցին անունը հրապարակել չցանկացած քաղաքացիները, որոնց անձնագրերում դրված կնիքից քվեարկությունից 40-50 րոպե անց հետք չի մնացել:
Մեկնաբանելով իրավիճակը՝ 36/7 ընտրատեղամասի հանձնաժողովի ղեկավար Նունե Գրիգորյանը նշեց, որ կնիքի համար թանաքը պատրաստել են՝ բոլոր կանոններին հետեւելով. 5 րոպե խառնել են, իսկ հետո՝ 15 րոպե թափահարել: Փորձնական կնիքը ցնդել է մեկ ժամվա ընթացքում, ինչի մասին տեղեկացրել են ՀՀ Կենտրոնական ընտրական հանձնաժողովին, որտեղ խորհուրդ են տվել խառնուրդին նորից թանաք ավելացնել: Նոր փորձնական կնիքը դեռեւս ամբողջությամբ չի անհետացել, բայց կարճ ժամանակ անց թանաքը նկատելիորեն խունացել է:
Նույնպիսի իրավիճակ է նաեւ 36/4 տեղամասում: Ընտրատեղամասում գտնվող թեկնածուների վստահված անձինք NEWS.am-ի թղթակցի հետ զրույցում նշեցին, որ այստեղ խառնուրդին թանաք են ավելացրել, եւ խնդիրը, կարծես, լուծվել է:
