Ռուսաստանը իրավունք ունի չեղարկել «Թուրքական հոսք» գազատարի երկրորդ ծովային խողովակաշարի շինարարությունը, ասվում է գազատարի նախագծի շուրջ Թուրքիայի ու Ռուսաստանի միջեւ համաձայնագրի ստորագրման վերաբերյալ ՌԴ կառավարության կարգադրության մեջ։ Փաստաթուղթը հրապարակվել է իրավական տեղեկատվության ինտերնետային պորտալում։
Փաստաթղթում նշվում է, որ ըստ համաձայնագրի Ռուսաստանը կարող է չեղարկել գազատարի երկրորդ ծովային խողովակաշարի իրականացման մասին պայմանավորվածությունները։ Եթե ՌԴ իշխանությունները համապատասխան որոշում կայացնեն, ըստ փաստաթղթի նրանք ստիպված կլինեն պաշտոնապես տեղեկացնել այդ մասին Թուրքիային։ Կարգադրությունը ստորագրվել է երկու երկրների կառավարությունների ներկայացուցիչների կողմից, հայտնում է «ՌԲԿ»-ն։
Ռուսաստանն ու Թուրքիան հոկտեմբերի 10-ին կնքել են միջկառավարական համաձայնագիր՝ «Թուրքական հոսքի» երկու խողովակաշարերի շինարարության մասին։ «Թուրքական հոսքի» ցամաքային մասի սեփականատերը թուրքական ընկերությունն է լինելու, իսկ ծովային մասինը՝ ռուսական ընկերությունը։ Գազատարի երկրորդ խողովակաշարի համար համատեղ ձեռնարկություն է ստեղծվելու։
«Գազպրոմի» ղեկավար Ալեքսեյ Միլլերի խոսքով «Թուրքական հոսքի» շուրջ համաձայնագիրը նախատեսում է գազատարի երկու խողովակաշարերի շինարարություն՝ Սեւ ծովի հատակով։ Յուրաքանչյուր խողովակաշարի հզորությունը կկազմի 15 մլրդ 750 մլն խորանարդ մետր գազ։ Դրանցից մեկը նախատեսված է թուրքական շուկա գազի մատակարարումների համար, երկրորդը՝ Թուրքիայի տարածքով եվրոպական երկրներ գազի տարանցիկ մատակարարումների համար։
Գազատարի շինարարությունը կսկսվի 2018-ին, հոկտեմբերի 11-ին այդ մասին հայտնել է Ալեքսեյ Միլլերը։ «Գազպրոմի» ղեկավարի խոսքով նախագիծը իրականացումը կավարտվի մինչեւ 2019-ի դեկտեմբեր։
