ԵԽԽՎ նախագահ Պեդրո Արգամունտը պատասխան է տալու իր բոլոր խոսքերի համար: Այս մասին, այսօր՝ հոկտեմբերի 17-ին, ԱԺ-ում լրագրողների հետ զրույցում նշել է ԵԽԽՎ-ում հայկական պատվիրակության անդամ Նաիրա Զոհրաբյանը՝ անդրադառնալով ԵԽԽՎ նախագահ Պեդրո Ագրամունտի հետ կապված սկանդալին, երբ վերջինս անջատել էր Նաիրա Կարապետյանի եւ Նաիրա Զոհաբյանի խոսափողները:
«ԵԽԽՎ նստաշրջանը, ինչպես միշտ, բավականին լարված էր, որովհետեւ մենք այնտեղ աշխատում ենք Միլի մեջլիսի ռեժիմով: Թուրք-ադրբեջանական լոբբիի գերակայության պայմաններում մենք կարողանում ենք մեր առջեւ դրված խնդիրները լուծել: Ինչ վերաբերում է տեղի ունեցած միջադեպին, սա աննախադեպ էր: Ես զրուցել եմ ԵԽԽՎ հնաբնակների հետ, նաեւ ծանոթ ենք ԵԽԽՎ կանոնակարգին, ըստ որի միայն մի դեպքում դու իրավունք չունես կոնկրետ թեմայի մասին խոսել, եթե տվյալ թեմայով որեւէ զեկույց ներառված է նստաշրջանի օրակարգում:
Այսինքն Ագրամունտը կոպտագույն խախտում թույլ տվեց՝ ընդհատելով Նաիրա Կարապետյանի եւ իմ ելույթները: Ընդ որում, Հերմինե Նաղդալյանի հետ հանդիպմանը նա չի էլ ժխտել, որ խախտել է կանոնակարգը: Մենք հետամուտ ենք լինելու բոլոր կանոնակարգերով, որ նա պատժվի»,-հայտարարեց Զոհրաբյանը:
Նրա խոսքով, Ագրամունտը հիստերիկայի մեջ ընկավ, որովհետեւ մենք բարձրացրինք իր համար ցավոտ մի թեմա. «ԵԽ-ում կոռուպցիայի թեման, եւ քանի որ Ագրամունտը հայտնի կոռուպցիոներ է, եւ Ուկրաինայի պատվիրակությունը ԵԽԽՎ-ում զուգընթաց գործ է սկսել Ագրամունտի դեմ եւ նրանք փաստեր են ներկայացնելու, որ Ագրամունտը սպասարկել է Ռուսաստանի շահերը,այդ ամենով հանդերձ, Ագրամունտը դրսեւորեց ԵԽԽՎ նախագահին ոչ հարիր, անհավասարակշիռ պահվածք՝ անջատելով իմ խոսափողը եւ հայտարարելով, որ մարդ կհրավիրի, որ ինձ դուրս հրավիրեն: Նա, բնականաբար, դրա համար պատասխան է տալու: Ես, իհարկե, ասացի, որ Դուք նույն ադրբեջանական լոբբիստն եք, ինչպես Լուկա Վոլոնտեն»:
Նաիրա Զոհրաբյանը տեղեկացրեց, որ ԵԽԽՎ-ում հայկական պատվիրակությունով կքննարկեն խնդիրը եւ իրավական բոլոր ընթացակարգերով կհասնեն նրան, որ Ագրամունտը պատասխանատվության ենթարկվի:
«Որեւէ մեկն իրավունք չունի կամայականորեն անջատել իմ խոսափողը՝ ասելով, որ իմ օգտագործած բառապաշարն իր դուրը չի գալիս»,-ընդգծեց նա:
