Եվրահանձնակատարները կքննարկեն Բելառուսի դեմ ԵՄ պատժամիջոցների ամբողջական չեղարկման հնարավորությունը։ Այս մասին ասված է հանրապետության Նախարարների խորհրդի հայտարարության մեջ, որն արվել է բելառուսական պատվիրակության՝ Բրյուսել այցի արդյունքում, փոխանցում է «ՌԻԱ Նովոստի»–ն։
Պատվիրակությունը գլխավորում էր փոխվարչապետ Անատոլի Կալինինը։ Նա բանակցել է ԵՄ 2 գլխավոր հանձնակատարների՝ տրանսպորտի եւ հարեւանության քաղաքականության հանձնակատարների հետ։ Բացի այդ, հանդիպումներ են կայացել խոշոր արդյունաբերական կառույցների ղեկավարների հետ։ Հարեւանության քաղաքականության հանձնակատար Յոհաննես Հանի հետ բանակցությունների ժամանակ Բելառուսի փոխվարչապետն անդրադարձել է ԵՄ պատժամիջոցների լիակատար չեղարկման հնարավորությանը։
«Պարոն Հանը նշել է, որ անպայման կքննարկի այդ պահը իր եվրահանձնակատար գործընկերների հետ»,– ասված է հաղորդագրության մեջ։
ԵՄ արտգործնախարարների խորհուրդը փետրվարին չեղարկել էր Բելառուսի դեմ պատժամիջոցների մի մասը՝ ուժի մեջ թողնելով զինագործական էմբարգոն։ Բելառուսը գրեթե 20 տարի քաղաքական եւ տնտեսական պատժամիջոցների տակ էր։