«Բարգավաճ Հայաստան» կուսակցության տեղական կառույցների նախաձեռնությունն է գնալ Գագիկ Ծառուկյանի տան մոտ եւ պահանջել նրա վերադարձը: Այս մասին այսօր՝ հոկտեմբերի 24-ին, խորհրդարանում լրագրողների հետ զրույցում ասաց ԲՀԿ-ական պատգամավոր Միքայել Մելքումյանը:
«Դրա մասին շատ է խոսվել վերջին ժամանակահատվածում: Մեր տարբեր տեղական կառույցներ նման նախաձեռնություն են ունեցել ու իրենց մտադրությունը չեն թացրել, այսօր էլ որոշել են գնալ եւ իրենց ցանկությունը հայտնել»,- ասաց Միքայել Մելքումյանը՝ նշելով, որ իրենց տեղյակ են եղել այդ նախաձեռնության մասին:
Այնուամենայնիվ, Միքայել Մելքումյանը չցանկացավ խոսել Ծառուկյանի հավանական վերադարձի եւ դրանից հետո սպասվող իրադարձությունների մասին. «Մարդիկ կան մարզերում, որոնք չգիտեն, որ Ծառուկյանը դուրս է եկել, բերում նամակներ են տալիս պատգամավորներիս, որ փոխանցենք Ծառուկանին»:
Նշենք, որ արդեն տեւական ժամանակ է՝ մամուլը գրում է, որ Ծառուկյանը ցանկանում է վերադառնալ ակտիվ քաղաքականություն: