ԵՊՀ մշակութաբանության ամբիոնի վարիչ, ԳԱԱ հնագիտության և ազգագրության ինստիտուտի Արցախի հնագիտական արշավախմբի ղեկավար Համլետ Պետրոսյանը դեռեւս չի շփվել մշակույթի նոր նախարար Արմեն Ամիրյանի հետ, սակայն նախարարության մասնակցությամբ մի դրվագ նրան սաստիկ վշտացրել է:
Նոյեմբերի 4-ին լրագրողների հետ հանդիպմանը նա նշեց, որ իրեն առայժմ ոչ մի մակարդակով ոչ մի հանդիպում չի առաջարկվել, սակայն 10 օր առաջ ի պատասխան եզակի հուշարձանի ոչնչացման վերաբերյալ իր հաղորդագրությանը՝ նախարարության կայքում հաղորադագրույուն է հայտնվել, որում հնագետին մեղադրել են ստահոդ լուրեր տարածելու մեջ:
Համլետ Պետրոսյանը նշեց, որ խոսքը Մետաքսի ճանապարհի վրա գտնվող եզակի հուշարձանի՝ Սյունիքի մարզի Հարժիսի քարավանատան եւ հին ճանապարհի մասին է: Իր վերջին ուղեւորության ընթացքում մասնագետը հայտնաբերել է, որ 13-րդ դարի պահպանված ճանապարհի 150 մետրը բուլդոզերով փորել են: Իսկ «Ֆեյսբուք»-ում տեղադրած իր զայրալից գրառմանն ի պատասխան Մշակույթի նախարարության կայքում հաղորդագրություն է հայտնվել, որում նշված է, որ Համլետ Պետրոսյանն առաջին անգամ չէ, որ ստահոդ լուրեր է տարածում: Եվ տեղադրել են ոչ այն ռակուրսով արված լուսանկար: Իսկ երբ զանգահարել է նախարարություն՝ հետաքրքրվելու, թե ինչու ճիշտ լուսանկարներ չեն հրապարակում, նրան ասել են. «Դե, հին ճանապարհը վերանորոգել են»:
Հնագետը կարծում է, որ եթե ինքը խնդրի մասին բարձրաձայն հայտարարում է, ապա դրա համար իրեն պետք է շնորհակալ լինել: «Նախարարության գործառույթն ինձ բարոյական քարոզ կարդալը չէ, նրա գործառույթը հուշարձանների պահպանությունն է»,- ասաց նա: