Հիլարի Քլինթոնի՝ նախագահ դառնալու դեպքում ԱՄՆ-ը կարող է նոր խթան հանդիսանալ ղարաբաղյան հակամարտության եւ հայ-թուրքական հարաբերությունների կարգավորմանը: Այս մասին նոյեմբերի 8-ին ասել է Քաղաքական եւ միջազգային հետազոտությունների կենտրոնի փորձագետ Ռուբեն Մեհրաբյանը:
Անդրադառնալով NEWS.am-ի թղթակցի հարցին, թե ինչ շանսեր ունեն Հիլարի Քլինթոնն ու Դոնալդ Թրամփը, եւ ինչ հնարավոր փոփոխություններ կարող ենք սպասել երկրի արտաքին քաղաքական կուրսում, փորձագետը պատասխանեց, որ ԱՄՆ-ը մեծ պետություն է, եւ անկախ այն հանգամանքից, թե ով է նրա նախագահը, արտաքին քաղաքականության մեջ ընդհանուր առմամբ մեծ փոփոխություններ չեն լինի:
«Բանավեճերի ընթացքում մենք տեսանք, որ Թրամփն ուղղակի պատկերացում չունի, թե ինչ է կատարվում աշխարհում: Երկրորդ հերթին՝ հարցումները ցույց են տալիս, որ Թրամփը այսօրվա դրությամբ հաղթանակի շանսեր չունի: Սակայն Սենատում եւ Կոնգրեսում հանրապետականները կարող են անգամ ամրապնդել իրենց դիրքերը»,- ընդգծեց Մեհրաբյանը:
Նա նշեց, որ դրանից հետեւում է, որ ԱՄՆ-ը Դեմոկրատական կուսակցությունից նախագահ կունենա: «Կարծում եմ, որ Քլինթոնի նախագահությունը կարող է նոր խթան հաղորդել առաջին հերթին հայ-ամերիկյան հարաբերություններին: Երկրորդ հերթին՝ դա կարող է նոր խթան հաղորդել տարածաշրջանային գործընթացներին, մասնավորապես, ղարաբաղյան կարգավորմանն ու հայ-թուրքական հարաբերություններին, որոնցով Քլինթոնն անձամբ զբաղվում էր պետքարտուղար լինելու լինելու տարիներին»,- եզրափակեց Ռուբեն Մեհրաբյանը:
