Ավետիսյանների ընտանիքի սպանության գործով Վերաքննիչ դատարանը մերժեց տուժողի իրավահաջորդի ներկայացուցիչ Արթուր Սաքունցի ներկայացրած միջնորդությունը դատախազի բացարկի մասին։ Դատարանի կարծիքով դատախազի գործողությունների հետ համաձայն չլինելը բացարկի հիմք չէ։
Իրավապաշտպանը որպես հիմք նշեց, որ գործի դատախազ Գեւորգ Գեւորգյանը բավարար ջանքեր չի գործադրել ռուսական կողմից իրականացվող գործի հետաքննության մեջ իրավահաջորդների մասնակցության հարցում։ Ի վերջո իրավապաշտպանը նշեց, որ դատախազը հավուր պատշաճի չի ներկայացնում պետության շահերը։
Սաքունցը հավելեց, որ կասկածում է այդ գործով ցանկացած դատախազի անաչառության մեջ։ Դրան ի պատասխան՝ դատավորը հետաքրքրվեց, թե ինչ հետագա քայլեր են ձեռնարկվելու միջնորդության բավարարման դեպքում։ «Այսինքն՝ մենք չդիմե՞նք գլխավոր դատախազություն այլ դատախազ տրամադրելու համար»,– հարցրեց դատավորը։ Այս հարցին կոնկրետ պատասխան չտրվեց։
Տուժողի իրավահաջորդի փաստաբանները դեմ արտահայտվեցին միջնորդությանը։ Դատախազը միջնորդությունը չհիմնավորված համարեց։
