Ավետիսյանների ընտանիքի սպանության գործով տուժողի իրավահաջորդի ներկայացուցիչ, Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցը Ռուսաստանին եւ Հայաստանին մեղադրեց պարտականությունները չկատարելու մեջ։
Նոյեմբերի 18-ին Վերաքննիչ դատարանի նիստում Սաքունցը նշեց, որ զորամասի ինքնակամ լքումն ու Ավեիսյանների սպանությունը պատճառահետեւանքային կապ ունեն, սակայն գործերը հետաքննվել են առանձին–առանձին։ Վալերի Պերմյակովի կողմից զորամասն ինքնակամ լքելու մասին հայկական կողմին հայտնել են մի քանի ժամ անց, այսինքն երբ արդեն հանցագործությունը տեղի էր ունեցել:
Իրավապաշտպանը մանրամասն թվարկեց Պերմյակովի առողջության մասին գործում եղած տվյալները: Նրա խոսքով, ռուսական կողմը տեղեկացված լինելավ այդ մասին, զորակոչել է Պերմյակովին եւ ուղարկել Հայաստան:
Հայաստանի կողմից ռուսական ռազմակայանի նկատմամբ վերահսկողության բացակայությունն ի սկզբանե հղի է վտանգավոր հետեւանքներով: Արդյունքում, Ռուսաստանն ու Հայաստանը չեն կատարել զոհերի կյանքը պահպանելու իրենց պարտավորությունները:
Միաժամանակ, Սաքունցը կարծում է, որ հետաքննությունը բավարար չափով լավ չի կատարվել: Իրավապաշտպանին բացարձակապես պարզ չէ, թե ինչպես հարեւանները չեն լսել կրակոցների ձայնը, ինչպես է Պերմյակովը մի քանի ժամ զբոսնել Գյումրիում եւ այդ ընթացքում նրան ոչ ոք չի տեսել, չեն ֆիքսել նաեւ տեսախցիկները: Հստակեցված չէ, թե ում է պատկանում Պերմյակովի հագուստի վրայի արյունը, նաեւ բավարար չափով ուսումնասիրված չէ սոցցանցերում Պերմյակովի գրագրությունը:
Սաքունցը ենթադրում է, որ Պերմյակովի հագուստը կարող էին գողանալ եւ օգտագործել: Նրան վստահություն չի ներշնչում նաեւ պնդումը, որ Պերմյակովը մենակ է գործել:
Ավելին, Պերմյակովի ցուցմունքները հակասական են, եւ նպատակ են ունեցել ապացուցել նրա մեղքը, ոչ թե վեր հանել ճշմարտությունը:
Սաքունցն ընդգծել է, որ քննչական փորձաքննություն չի կատարվել դեպքի վայրում, անցկացվել է մակետի վրա: Արդյունքում հստակեցված չեն զոհերի եւ հանցագործի գտնվելու վայրերը, պարզ չէ, թե որքան հեռավորությունից են լսվել կրակոցների ձայները:
Սաքուցնի պնդմամբ, հարեւաններից մեկն աշխատել է ռուսական ռազմակայանում, եւ հանցագործները կարող էին շփոթել տները, սակայն այդ վարկածը չի ստուգվել:
Իրավապաշտպանը պահանջեց չեղարկել դատարանի որոշումը եւ գործն ուղարկել լրացուցիչ քննության՝ Շիրակի մարզի դատարան: