«Матч ТВ» եւ «Eurosport» հեռուստաալինքերի ֆուտբոլային մեկնաբան, Ռուասստանում անգլիական ֆուտբոլի լավագույն մասնագետներից մեկը՝ Ալեքսանդր Ելագինը, NEWS.am-ի թղթակից Վերա Մարտիրոսյանի հետ զրույցում իր կարծիքը հայտնեց, թե ինչու «Մանչեսթեր Յունայթեդի» մարզիչ Ժոզե Մոուրինյոն Հայաստանի ազգային հավաքականի ավագ Հենրիխ Մխիթարյանին այդպես էլ չի խաղացնում:
Պարոն Ելագին, Դուք մեկնաբանում էի «Մանչեսթերի» վերջին խաղը «Արսենալի» հետ: Այդ խաղին Մխիթարյանը կրկին հայտավորված չէր: Ինչ եք կարծում, ինչո՞ւ նրան հնարավորություն չի տրվում խաղադաշտ դուրս գալ:
Հենրիխը շատ դժվար կացության մեջ է ընկել, քանի որ նրա դիրքում շատ լավ հանդես է գալիս Խուան Մատան, որն այս պահին Անգլիայի Պրեմիեր լիգայի լավագույն ֆուտբոլիստներից է: Բացի այդ, Մխիթարյանը վնասվածք ուներ, իսկ Մատան իր հնարավորությունն օգտագործեց: Մոուրինյոն մարզիչ է բնավորությամբ: Նա նախապատվություն է տալիս այն ֆուտբոլիստներին, որոնք որակյալ ֆուտբոլ են ցուցադրում: Մխիթարյանը պետք է դեռ հարմարվի Անգլիային: Նա Բունդեսլիգայում լավագույներից էր, բայց այստեղ ամեն բան այլ է՝ մրցակիցները ուժեղ են ու ամեն խաղում գրեթե պետք է դաշտում մահանալ: Մխիթարյանը դեռ ժամանակ կունենա իրեն դրսեւորելու: Մրցաշրջանը երկար է: Բայց, եթե իմ կարծիքն եք հարցնում, նա իզուր փոխեց Գերմանիան Անգլիայով: Իհարկե, այսպիսի առաջարկներից չեն հրաժարվում, բայց ՄՅՈՒ-ն իր թիմը չէ:
Իսկ Անգլիայում ո՞րն է իր թիմը:
«Արսենալը» կարծում եմ ավելի հարմար թիմ էր, թեեւ այնտեղ էլ շատ ուժեղ մրցակցություն է: Այնտեղ կա հզոր Օլիվյե Ժիրուն: Մխիթարյանը հարձակվող չէ, նա ավելի շատ երկրորդ գծի հարձակման ֆուտբոլիստ է:
Մանչեսթերի մոտ դժվար ժամանակներ են ու նրանք միավորներ չեն ցանկանում կորցնել: Այդ պատճառով փորձարկումներ չեն անում, այլ խաղացնում են նրանց, որոնք արդեն խաղացված է: Թիմը պետք է գոնե Չեմպինոների լիգա մտնի:
Այդ դեպքում որտե՞ղ է տրամաբանությունը: Եթե թիմը միավորներ է կորցնում, որեմն այնքան էլ լավ չի խաղում: Ինչո՞ւ հնարավորություն չտալ այլ ֆուտբոլիստներին:
Մխիթարյանի հարցում արդեն ասացի, որ նրա դիրքում լավ է հանդես գալիս Մատան:
Կարծիք կա, որ Մխիթարյանն ու Մոուրինյոն անձնական խնդիր ունեն, կամ բնավորությունները չեն համընկել:
Հիմարություն է: Ոչ մի մարզիչ ինքն իրեն չի վնասի: Եթե նա տեսնում է, որ ֆուտբոլիստը լավ ֆուտբոլ է ցուցադրում, անգամ եթե նրա հետ խնդիր ունի, ինքն իրեն վատություն չի անի: Նույն Մատան Բենիտեսի «Չելսիում» լավագույներից էր, հետո եկավ Մուորինյոն: Նրանց մոտ չստացվեց ու Մատան հեռացավ ՄՅՈՒ: Երբ Մոուրինյոն եկավ «Մանչեսթեր» բոլորը կարծում էին, թե Մատան կհեռանա, բայց տեսեք, որ դարձավ լավագույներից մեկը:
Վստահ եմ, որ Մխիթարյանը դժգոհ է իր գործերից «Մանչեսթերում»: Գերմանիայում նա լավագույներից էր: Երեւի՝ նա չի մտնում Մոուրինոյի ծրագրերի մեջ: Եթե Մխիթարյանը պետք լիներ Ժոզեին, անձնական խնդիրները դեր չէին խաղա: Իմ կարծիքով դա լրագրողների հորինածն է:
Եթե «Մանչեսթերը» միավորներ կորցնի ու չմտնի Չեմպիոնների լիգա, Մոուրինյոյին կհանե՞ն, թե՞ կթողեն մնա ու թիմ կառուցի:
«Մանչեսթերն» այս պահին 6-րդ տեղում է, միայն 6 միավոր է բաժանում քառյակում հայտնվելուց: Այստեղ շատ բան պարզ կլինի boxing day-ից հետո: Դեռ մրցաշարի կեսը չի անցել: Օրերս նրանք խաղալու են տանը «Ֆեյնորդի» հետ: «Մանչեսթերը» շատ լավ խաղաց «Արսենալի» հետ: Մեկ անգամ սխալվեցին: Ավելի լավ էին խաղում, բայց հաղթանակը չպահեցին: