Ստվերային բիզնեսը կարելի է եւ պետք է բացահայտել։ Այս մասին դեկտեմբերի 6-ին ԱԺ–ում ասել է ֆինանսների նախարար Վարդան Արամյանը՝ ներկայացնելով 2017-ի պետբյուջեի լրամշակված նախագիծը։
Պատասխանելով ՕԵԿ խմբակցության ղեկավար Հեղինե Բիշարյանի հարցին՝ նա ասել է, որ ստվերային բիզնեսի դեմ պայքարում են մոնիտորինգի եւ հետախուզական միջոցների օգնությամբ։ Սակայն մյուս կողմից Կառավարությունը նրանց նաեւ «կոնֆետներ» է առաջարկում։ Օրինակ՝ դեռ մի քանի տարի առաջ առաջարկվում էին արտոնություններ սահմանել շահութահարկի համար այն ընկերություններին, որոնք որոշում են ազգային ֆոնդային բորսայում լիսթինգ անցնել։ Սակայն մեծ հաշվով բիզնեսը դրանից չի օգտվել, քանի որ հարկեր չվճարելուց ստացվող եկամուտն ավելի մեծ է։ «Ելքը մեկն է, ինչպես ամբողջ աշխարհում. ամրապնդել գործարքների էլեկտրոնային փաստաթղթավորումը։ Որքան լավ են զարգացած նման համակարգերը, այնքան քիչ է «մոխրագույն» գործարքների համար հնարավորությունները»,– ասել է Արամյանը։
