ԲՀԿ դիրքորոշումը Վանաձորի ընտրությունների հարցում անփոփոխ է. խմբակցության անդամները չեն մասնակցելու ավագանու նիստերին։ Այս մասին դեկտեմբերի 9-ին՝ խորհրդարանական ճեպազրույցների ժամանակ, ասել է ԲՀԿ պատգամավոր Միքայել Մելքումյանը։
Նրա խոսքով՝ ԲՀԿ–ն շարունակելու է բոյկոտել Վանաձորի ավագանու նիստերը։ «Մինչեւ հայտնի չդառնան այն մարդկանց անունները, որոնք մի կողմ են թողել իրենց սկզբունքայնությունը»,– ասել է Մելքումյանը։
Հիշեցնենք, որ Վանաձորի քաղաքապետի ընտրություններից հետո դեռ չի հաջողվել ավագանու նիստ գումարել: Բանն այն է, որ ավագանու նիստ գումարելու համար անհրաժեշտ է ավագանու 17 անդամի ներկայությունը, սակայն ՀՀԿ-ն ու նրա կոալիցիոն դաշնակից ՀՅԴ-ն միասին՝ ունի միայն 15 անդամ, իսկ ոչ իշխանական ուժերը՝ ԲՀԿ-ն, «Լուսավոր Հայաստանն» ու «Հայկական վերածնունդը» միասին՝ 18 անդամ: