Դեկտեմբերի 9-ին հայտնի դարձան «Բաց խաղ» առաջնության հաղթողների անունները: Մինչեւ 18 տարեկան տարիքային խմբում «Լավագույն խաղ» անվանակարգում հաղթեց Marimba թիմը՝ իր Get’n’Go խաղով, իսկ Scratch ծրագրով «Լավագույն խաղ» ճանաչվեց Մասրիկ թիմի Marvel&UnitedForses խաղը: «Լավագույն դիզայն» անվանակարգին արժանացավ VAV թիմի SURVIVER խաղը: Հաղթողները ստացան համապատասխանաբար 350 000, 160 000 եւ 200 000 դրամ դրամական պարգեւներ:
18 տարեկանից բարձր տարիքային խմբում «Լավագույն դիզայն», «Լավագույն սցենար» անվանակարգերում համապատասխանաբար հաղթող ճանաչվեցին B.H.H. թիմի Upper 8 եւ Gradius թիմի Vrun խաղերը՝ արժանանալով 270 000 եւ 200 000 դրամ մրցանակների:
«Այսօր աշխարհը հեղափոխող ամենակարեւոր հատկանիշը ստեղծագործ միտքն է: Այս նախաձեռնության նպատակն է բացահայտել եւ զարգացնել ստեղծագործ երեխաներին, թեւ տալ նրանց գաղափարներին: Ուրախալի է եւ փաստ, որ եթե տարիներ առաջ առաջնությանը մասնակցում էին ոլորտում փորձ եւ անուն ունեցող պրոֆեսիոնալ մասնագետներ, ապա այժմ արդեն դպրոցահասակ մասնակիցները զարմացնում են մեզ իրենց ստեղծագործ լուծումներով»,- ասել է ԻՏՁՄ փոխնախագահ Հայկ Չոբանյանը միջոցառման ժամանակ:
«Բաց խաղ» համակարգչային եւ բջջային խաղերի նախագծման առաջնությունը 2011 թվականից իրականացվել է ԻՏՁՄ եւ Օրանժ, իսկ այժմ` Ucom ընկերության համատեղ ջանքերով: Արդեն երկու տարի է, ինչ մրցույթի գործընկեր է հանդիսանում Huawei ընկերությունը: Առաջնության նպատակն է բացահայտել եւ խրախուսել տեխնոլոգիական ոլորտում ներուժ ունեցող երիտասարդներին՝ խաղերի սպառողներից նրանց վերածելով արտադրողների:
