2016 թվականը Հայաստանի երկաթուղու համար եղել էր բավականին դժվար, ընկերությունն աշխատում էր խիստ մրցակցության պայմաններում: Այս մասին հայտարարել է «Հարավկովկասյան երկաթուղի» ՓԲԸ լխավոր տնօրեն Սերգեյ Վալկոն՝ ընկերության աշխատանքների ամփոփման ժամանակ:

Նրա խոսքով, իրենց հաջողվել է ապահովել երկաթուղու եկամուտները նախատեսված ցուցանիշի 100,7% մակարդակի վրա: Ընկերության ղեկավարը նշեց, որ 2016-ին շահագործման է հանձնվել Հայաստանի տարածքում ТР-3 տիպի վերանորոգում անցած առաջին էլեկտրագնացքը եւ ավարտել Հայաստանի տարածքով իրականացված Եվրոպայից Իրան առաջին մուլտիմոդալ բեռնափոխադրումը:

Վալկոյի ներկայացմամբ, նշված ժամանակահատվածում արտահանումը 9%-ով կամ 28,8 հազ տոննայով գերազանցեց 2015-ի ցուցանիշը, իսկ ներմուծումը կրճատվել է 18,5%-ով:

Խոսելով գնացքների ժամանակացույցի մասին՝ ՀԿԵ գլխավոր տնօրենը նկատեց, որ տարվա ընթացքում երկաթուղին սպասարկել է 13 048 գնացք, որից 12 919-ը՝ ըստ չվացուցակի: 

Գլխավոր տնօրենը հայտնեց, որ տարվա ընթացքում կապիտալ վերանորոգվել է 12,7 կմ գիծ, փոխվել է 39,4 հազար կոճ, այդ թվում՝ 20 հազար նոր երկաթբետոնե եւ 10 հազար նոր փայտե:

Աճ գրանցվեց նաեւ ուղեւորափոխադրումների ոլորտում՝ ուղեւորաշրջանառության ծավալն ավելացել էր 12,1%-ով, այդ թվում՝ 24,5%-ով՝ միջազգային եւ 0,4%-ով՝ տեղական հաղորդակցությունում: