Թուրքիայի քրդամետ «Ժողովուրդների դեմոկրատական» (HDP) կուսակցության հայ պատգամավոր Կարո Փայլանի դեմ հայց է ներկայացվել Էդիրնեի արդարադատության պալատ, գրում է թուրքական YeniAsia.com-ը:
Պարբերականի փոխանցմամբ, թուրքական «Մեծ միություն» կուսակցության Էդիրնեի մասնաճյուղի ղեկավար Արիֆ Քյորօղլուն եւ մի շարք քաղաքացիներ, հայց են ներկայացրել դատարան՝ պահանջելով զրկել պատգամավորի մանդատից եւ քաղաքացիությունից:
Քյորօղլուն հայտարարել է, որ խորհրդարանում «ցեղասպանություն» բառն օգտագործելը վիրավորանք է թուրք ժողովրդի հասցեին: Նա պնդել է, որ Թուրքիայի Հանրապետության ստեղծումից ի վեր Թուրքիայի հայ քաղաքացիները ապրում են խաղաղության եւ համաձայնության մթնոլորտում: «Թուրք ազգի կողմից չիրականացվածն իրականության քողի տակ ներկայացնել փորձող այս մարդուն ոչ միայն պատգամավորական մանդատից, այլեւ քաղաքացիությունից կզրկենք»,-հայտարարել է նա՝ հավելելով, որ Կարո Փայլանն իր վարքով ժողովրդի շրջանում քեն եւ ատելություն է տարածում:
Նշենք, որ օրեր առաջ Կարո Փայլանը մեջլիսում խոսել էր Հայոց ցեղասպանությունից, որից հետո խորհրդարանական երեք կուսակցությունների պատգամավորներն իրար հերթ չտալով քննադատում են Կարո Փայլանին։ Բացի այդ, Կարո Փայլանին զրկել են երեք նիստի մասնակցելու իրավունքից։