Հայաստանում ՏՏ ոլորտի բնականոն զարգացման արդյունքում 2025 թվականին 40 հազար մասնագետ ինքնըստինքյան կլինի։ Դրա համար պետք չէ հատուկ ռազմավարական ծրագրեր մշակել։ Այդ ոլորտի զարգացման համար իրական արդյունավետ ռազմավարությունը պետք է ուղղված լինի առաջիկա 10 տարում 70-80 հազար մասնագետների ձեւավորմանը։ Լրագրողների հետ հանդիպմանն այսօր նման կարծիք հայտնեց ՏՏ ձեռնարկությունների միության նախագահ Կարեն Վարդանյանը։
Նրա խոսքով, եթե Հայաստանում ՏՏ ոլորտի զարգացումը գնա ճիշտ ուղով եւ իրականացվեն բոլոր պլանավորված ծրագրերը, օրինակ, «Իրական դպրոցը», ապա բոլոր ուսումնական հաստատություններում կհայտնվեն «ինժեներական դասարաններ», իսկ 2025 թվականին Հայաստանում կլինի համաշխարհային շուկայի ամենամրցունակ ՏՏ ոլորտներում աշխատող առնվազն 70 հազար լավ մասնագետ։
Կարեն Վարդանյանի առաջարկած ռազմավարությունը ներառում է 4 հիմնական կետ
• Կրթություն
• Բիզնեսի զարգացում
• Կառավարության հետ համագործակցություն
• Արտասահմանում Հայաստանը՝ որպես բրենդ ներկայացնելը
Նրա կարծիքով կարեւորագույն կետը կրթությունն է։ Կարեն Վարդանյանի եւ նրա գործընկերների նախաձեռնությամբ ներառված 2 կրթական ծրագիր արդեն մասամբ իրականցվում են Հայաստանում, իսկ երրորդի մեկնարկը մոտ է։ Առաջին ծրագրի շրջանակում 190 դպրոցներում ինժեներական լաբորատորիաներ են բացել, որտեղ երեխաները կարող են ուսումնասիրել ՏՏ–ի եւ ռոբոտաշինության հիմունքները։ Կարեն Վարդանյանը նշեց, որ ինչքան շուտ նման դասասենյակներ բացեն մնացած դպրոցներում, այնքան լավ կանդրադառնա դա երկրի եւ նրա հետագա զարգացման վրա։
Կարեն Վարդանյանի խոսքով՝ նման դասասենյակներ բացելու առաջին արդյունքները տեսանելի կլինեն արդեն 2019-ին՝ Տեղեկատվական տեխնոլոգիաների համաշխարհային կոնգրեսի ժամանակ (WCIT)։
Այդ քայլը մեծ ուշադրություն կհրավիրի երկրի նկատմամբ, կսկսեն գալ խոշորագույն ՏՏ կազմակերպությունների ներկայացուցիչներ, ինչի շնորհիվ ՏՏ ոլորտը եւ բիզնեսը երկրում կսկսեն զարգանալ։
«Եթե մեզ ճանաչեն որպես ինժեներական կրթության ոլորտի առաջատար երկիր, վաղը, մյուս օրը մենք ստիպված չենք լինի մարդկանց բացատրել, որ Հայաստանը Ռումինիան կամ Ալբանիան չէ, այն ոչ ոք չի շփոթի նման անվանումներով այլ երկրների հետ»,– ասաց Վարդանյանը։
Մյուս ծրագիրը, որն այսօր գործում է երկրում, «Իրական դպրոցն» է։ Վարդանյանի խոսքով՝ դա մասնակի բակալավրիատ է, որտեղ կրթություն են ստանում 15-18 տարեկան երեխաները։ 18 տարեկանում այդ երիտասարդները բավարար գիտելիքներ կունենան ՏՏ ընկերություններում աշխատելու համար։ Դեռեւս այդ ծրագրի շրջանակում կրթություն է ստանում 20 երեխա, սակայն եթե ծրագիրը հաջողվի, այն կտարածվի ամբողջ երկրում։
Կարեն Վարդանյանը նաեւ առաջարկում է Ճարտարագիտական համալսարանը կցել բանակին։ Այդպես համալսարանը կրթական հաստատությունից կվերածվի գիտահետազոտական հաստատության, որի ուսանողները կարող են ոչ միայն սովորել, այլ նաեւ լուծել ռազմական խնդիրներ եւ նոր տեխնոլոգիաներ մշակել բանակի համար։