Հնարավոր է՝ Վաշինգթոնը ճանաչի եզդիների, նաեւ կրոնական փոքրամասնությունների, օրինակ՝ քրիստոնյաների ցեղասպանությունը Մերձավոր Արեւելքում եւ Հյուսիսային Աֆրիկայում՝ Իրաքում, Սիրիայում եւ Լիբանանում, հայտնում է RT-ն:
Համապատասխան օրինագիծը ԱՄՆ Կոնգրեսի քննարկմանն է ներկայացրել Ներկայացուցիչների պալատի անդամ, Քալիֆորնիայից ընտրված Դանա Ռորաբահերը:
«Պետք է ապահովենք այդպիսի արտասահմանցիների տվյալների արագ մշակում, կիրառենք վիզաների տրամադրման դյուրացված ընթացակարգեր, նրանց ապաստան տրամադրենք եւ մյուս միգրանտների շարքում արտոնյալ կարգավիճակ տանք»,- նշված է փաստաթղթում:
Նշվում է, որ եթե նախաձեռնությունն աջակցություն ստանա, ցեղասպանությունից տուժած եզդիներին եւ քրիստոնյաներին ԱՄՆ կհրավիրեն:
Իրաքում եզդի բնակչությունը ահաբեկիչների գլխավոր թիրախներից մեկն է: Այսպես՝ 2014 թվականի օգոստոսին Շանգալում ահաբեկիչները ոչնչացրել են տասնյակ եզդիների, որոնք հրաժարվել են իսլամ ընդունել, իսկ հազարավոր կանայք սեքսուալ ստրկության են ենթարկվել, ավելի քան 300 հազար եզդիներ փախստական են դարձել, մոտ 70 հազար մարդ ստիպված էր թաքնվել եւ քաղցի մատնվել: