Բաքուն ԵԱՀԿ-ում դիմել է տարրական շանտաժի ու ձախողել կառուցողական որոշումը։ Այս մասին Կառավարության հունվարի 19-ի նիստից հետո լրագրողներին ասել է փոխարտգործնախարար Շավարշ Քոչարյանը։
Նրա խոսքով, Ադրբեջանն օգտվում է նրանից, որ ԵԱՀԿ-ում որոշումները կայացվում են կոնսենսուսով։ Հենց դրա համար էլ կարողացել է ձախողել շփման գծում հետաքննությունների մեխանիզմի ներդրման համար ծախսերի հաստատումը՝ չնայած այդ տողն արդեն ընդգրկված էր ԵԱՀԿ բյուջեում։ «Ադրբեջանը վետոյի կիրառման սպառնալիքով ձախողել է այդ գործընթացը։ Այս մոտեցումը նոր չէ ու հերթական անգամ պահանջում է Բաքվի գործողությունների հասցեական գնահատական։ Իհարկե, իրավական տեսակետից դժվար է չեղարկել որոշումների կայացման կոնսենսուսային կարգը։ Բայց կան նաեւ այլ միջոցներ, որոնցով հնարավոր է ազդել մի երկրի վրա, որն իրեն միջազգային իրավունքից դուրս է դասել»,- նշել է Քոչարյանը։
