«Ելք» դաշինքը հանդես է գալիս խաղաղ ճանապարհով, ընտրությունների միջոցով իշխանափոխության օգտին: Այս մասին հունվարի 21-ին լրագրողների հետ զրույցում «Ելք» դաշինքի առաջին համաժողովից հետո հայտարարեց «Լուսավոր Հայաստան» կուսակցության նախագահ, ԱԺ անկախ պատգամավոր Էդմոն Մարուքյանը:
Նրա խոսքով՝ ժողովուրդը ընտրությունից ընտրություն հուսահատվում է: «Հույսը վերածնվում է, բայց այն պետք է ճիշտ ուղղորդել, այն փոփոխությունների տանել, այլ ոչ թե ձախողման: Մենք բռնի մեթոդներ չենք քարոզում, մենք խաղաղ ճանապարհով, ընտրությունների միջոցով իշխանափոխության կողմնակից ենք: Եվ ցույց ենք տվել, որ այդ փոփոխությունները հնարավոր են: Եթե Վանաձորում կարողանայինք ավելի լավ դիրքերից հանդես գալ, ավելի համախմբված լինեինք, այսօր կունանայինք ոչ թե 11 հազար ձայներ, այլ 16-17 հազար, եւ հանրապետության իր մեծությամբ երրորդ քաղաքում մենք կձեւվորեինք իշխանությունը»,- նշեց Էդմոն Մարուքյանը՝ շարունակելով, որ Վանաձորում համախմբվածության բացակայության պատճառով իրենք չեն հաղթել, այլ այնպես են արել, որ ՀՀԿ-ն պարզապես փոքրամասնություն է կազմել: «Բայց մենք միանշանակ կհաղթեինք մեծ համախմբվածության դեպքում: Դա բոլորիս համար դաս է, եւ մենք այդ դասը խորհրդարանական ընտրություններում կօգտագործենք»,- հավելեց նա:
