![](img/news/36/95/12/default.jpg)
«Հայկական ժամանակ» թերթը գրում է. «ՀՀ նախկին վարչապետ Հովիկ Աբրահամյանը երեկ հաստատեց տեղեկությունները, որ դուրս է գալիս ՀՀԿ-ից եւ այդ մասին այսօր հայտարարությամբ հանդես կգա: Երեկվա դրությամբ, սակայն, ՀՀԿ-ում Աբրահամյանից դիմում դեռ չէին ստացել:
Նախկին վարչապետի երեկվա աղմկոտ հայտարարությունից հետո ՀՀԿ-ի կուլիսներում սկսեցին խոսել, որ Աբրահամյանի հեռանալուց հետո իշխանությունները ձեռնամուխ են լինելու Արարատի մարզում նրա ունեցած ազդեցությունից ձերբազատվելուն: Այս ուղղությամբ որոշ քայլեր արդեն իսկ արվել են:
Հիշեցնենք, անցյալ տարի մարզի հարկային տեսչության պետի պաշտոնից ազատվեց Վարդան Մամիկոնյանը, որը Աբրահամյանի փեսայի եղբայրն է: Զբաղեցրած պաշտոնից ազատվեց Արարատի մարզի ոստիկանապետ Արսեն Աբրահամյանը՝ Հ. Աբրահամյանի եղբորորդին։ Մեր տեղեկություններով, մինչեւ ընտրությունները իշխանություններն էլ ավելի կամրապնդեն իրենց դիրքերն այդ մարզում:
Հնարավոր է, մարզպետի պաշտոնից ազատվի նաեւ Ռուբիկ Աբրահամյանը, որը Հ. Աբրահամյանի մտերիմն է եւ այդ պաշտոնին է նշանակվել վերջինիս՝ վարչապետ նշանակվելուց անմիջապես հետո եւ նրա աջակցությամբ: Կազատվեն Հ. Աբրահամյանի ազդեցության տակ գտնվող այլ չինովնիկներից կամ նրանց կհանձնարարվի խաղեր չտալ:
Մարզում հնարավորինս կուժեղացվեն «Ավշար» գործարանի սեփականատեր եղբայրներ Արամայիս եւ Արայիկ Գրիգորյանների դիրքերը, որոնք լարված հարաբերություններ ունեն Աբրահամյանների հետ»:
Առավել մանրամասն՝ թերթի այսօրվա համարում