Իշխանությունը փորձում է ապրիլին կայանալիք ընտրությունները տանել իր սցենարով. փորձում է ստեղծել արհեստական ընդդիմադիր դաշտ, որը կգործի իր հսկողության ներքո` այդպիսով չեզոքացնելով իրական ընդդիմադիրներին: Այս մասին այսօր` հունվարի 25-ին, լրագրողներին ասաց Քաղաքական եւ միջազգային հետազոտությունների հայկական կենտրոնի փորձագետ Ռուբեն Մեհրաբյանը:
Նրա կարծիքով` իշխանությունն իր համար ուզում է ընտրել «պարտնյոր», որը կմրցի իր հետ, բայց իր պայմաններով. «Այդ պայքարը կարող է ավարտվել մոտավորապես այնպես, ինչպես կավարտվի պայքարը բռնցքամարտիկի ու առաստաղից կախված տանձի միջեւ: Իշխանությունը որոշում է իր համար, թե ով է լինելու տանձ համար մեկը, տանձ համար երկուսը… իսկ մյուս ուժերը պետք է ընդհանրապես հեռու մնան քաղաքական պրոցեսից: Դրա համար պետք է քաղաքական պրոցեսը վերածել կրկեսի, ինչը հաջողվում է»,- ասաց նա:
Մեհրաբյանի խոսքով` Հայաստանի ներկայիս իշխանությունը, ենթարկվելով ռուսական կամքին, Հայաստանն ուզում է տանել ռուսական ուղիով:
«Ամեն ինչ արվելու է, որ ստեղծվի ռուսական դումայի մակետ, լինի չափավոր գժանոց, կրկես, դրա մասին էլ է մտածված: Բայց էս ամենը բախվելու է ֆորս մաժորի, որովհետեւ պարզ չէ, թե ով է լինելու իրական իշխանությունը Հայաստանում: Ապրիլի ընտրությունները ոնց էլ ավարտվեն, այս հարցին չեն կարող պատասխանել: Բայց 2017թ. ընթացքում ավարտվելու է Ռուսաստանի փողը, այժմ մնացել է 100 միլիարդից պակաս: Ի՞նչ է անելու դրանից հետո Հայաստանի իշխանությունը»,- նշեց փորձագետը:
Նա մտահոգություն հայտնեց, որ Հայաստանի վարած սխալ ներքին քաղաքականությունը պարունակում է ավելի մեծ վտանգներ` արտաքին քաղաքականության համար:
«Արտաքին քաղաքականությունը ներքինի շարունակությունն է: Մենք տեսանք, որ ԵԽԽՎ-ում մի հատ պարզ հարց հայկական դիվանագիտությունն ի զորու չէ լուծել: Բացի այդ, մենք քառօրյա պատերազմից հետո ոչ մի հետեւություն չարեցինք. այն պայմանները, որ հանգեցրին քառօրյա պատերազմին, այժմ պահպանվել են, դրա համար չի բացառվում, որ մենք կրկին բախվենք նման իրավիճակի` գուցե ավելի մեծ մասշտաբներով, որովհետեւ Ղարաբաղյան կարգավորման գործընթացում մենք ռուսական գրպանում մի մանրադրամ ենք, եւ, վցավոք սրտի, դա ձեռք է տալիս մեր իշխանություններին»,- ասաց Մեհրաբյանը: