Գերմանական KfW բանկը 5 միլիոն եվրո դրամաշնորհ կհատկացնի գյուղատնտեսության ապահովագրմանն աջակցելու նպատակով։ Այս մասին NEWS.am–ին հայտնել է Հայաստանում KfW բանկի ծրագրերի համակարգող Բելա Անդրիասյանը։ Գումարները կհատկացվեն այս տարի՝ 2018-21 թվականներին պիլոտային ծրագրով բաշխվելու նպատակով։ Սպասվում է, որ գյուղատնտեսության ապահովագրության աջակցության ծրագրին իր մասնակցությունը կունենա նաեւ Հայաստանի կառավարությունը։
Թե ինչ ռիսկերից են ապահովագրվելու հայ գյուղացիները (կարկուտ, երաշտ, անասնահոտի անկում եւ այլն), վնասի ինչ չափի սահմաններում եւ ինչ հատուցում կստանան՝ որոշելու է խորհրդատվական ընկերությունը, որի ընտրության միջազգային մրցույթը KfW բանկը արդեն հայտարարել է։ Մինչեւ տերեվերջ խորհրդատուն պետք է ավարտի հետազոտությունները, քանի որ պիլոտային ծրագիրը պետք է մեկնարկի 2018-ի սկզբին։
Հաշվի առնելով Հայաստանի գյուղատնտեսության բարձր ռիսկայնությունը եւ ոլորտի ապահովագրության փորձի պակասը՝ Գերմանիայի կառավարությունը կօգնի ներգրավել միջազգային ապահովագրողի, որը կհամաձայնի կիսել հայաստանյան ապահովագրողների ռիսկերը։