ՀՀ կառավարության աշխատակազմի ղեկավար-նախարար Դավիթ Հարությունյանը ներկայացրել է, թե ինչ թերություններ են արձանագրվել Գեղարքունիքի մարզի Սեմյոնովկա եւ Արմավիրի մարզի Վարդանաշեն համայնքներում կայացած ՏԻՄ ընտրությունների ժամանակ ընտրողների էլեկտրոնային գրանցում իրականացնող տեխնիկական սարքավորումները փորձարկելու ժամանակ (ֆոտոռեպորտաժ):
«Խնդիրների առաջին խումբը վերաբերում է վերահսկողությանը: Օրինակ, կրկնակի քվեարկության ժամանակ կարմիր նշան է ցույց տալիս, իսկ եթե սխալ տեղամաս է, դեղին լույս է վառվում: Անհրաժեշտություն կար, որ այդ նշանները մեծացվեն: Դիտորդների առաջարկով լույսը վառվելիս կլինի ձայնային ազդանշանով: Եթե անձնագիրը խազով է կամ մաշված, սարքը չի կարդում, առաջրակություն եղավ, որ կրկին ձայնային ազդանշան լինի»,- այսօր` փետրվարի 17-ին, հրավիրված մամուլի ասուլիսի ժամանակ ասաց Դավիթ Հարությունյանը:
Նրա խոսքով, մասնագետները ծրագրային ապահովման պարզեցման խնդիր են դրել, որն այժմ ուսումնասիրում են մասնագետները. «Հինգ ուղղությամբ ուսումնասիրությունները կատարված են եւ այժմ աշխատանքներն ընթանում են, կարծում եմ` լուրջ խնդիրներ չենք ունենա: Մարտի սկզբից 6 հազար մասնագետի թեկնածու կսկսի վերապատրաստվել»:
Հիշեցնենք, որ փետրվարի 12-ին Հայաստանում առաջին անգամ փորձարկվեցին տեխնիկական սարքավորումները: Այսպես, ապրիլի 2-ին ընտրողը մոտենալու է մասնագետին, ներկայացնելու անձը հաստատող ցանկացած փաստաթուղթ` անձնագիր, նույնականացման քարտ կամ կենսաչափական անձնագիր: Մասնագետը փաստաթուղթն անցկացնելու է սարքի միջով եւ ընտրողի տվյալները հայտնվելու էն էկրանին, դրանից էլ պարզ է դառնալու` ընտրողն առաջին անգամ է մասնակցում քվեարկությանը, եկել է կրկնակի քվեարկության, թե ընդհանրապես այդ տեղամասի ընտրող չէ: Եթե ընտրողն իսկապես եկել է առաջին անգամ քվեարկության, էկրանին կանաչ լույս է վառվելու, ընտրողից վերցվելու է մատնահետք, որից հետո սարքն արդեն կտպի կտրոնը, որի միջոցով էլ անձը կմասնակցի քվեարկությանը: Կտրոնի վրա պատկերված է տվյալ անձի լուսանկարը: Եթե ընտրողը եկել է կրկնակի քվեարկության, կարմիր լույս է վառվելու էկրանին եւ մասնագետը պարտավոր է անմիջապես ոստիկանություն հրավիրել: Եթե պարզվում է, որ անձը տվյալ ընտրական տեղամասի ընտրող չէ, դեղին լույս է վառվելու, որից հետո անձը պարտավոր է լքել տարածքն ու գնալ ընտրության այնտեղ, որտեղ հաշվառված է:
Տեխնիկական սարքավորումները ձեռք բերելուն աջակցել են դոնոր կազմակերպությունները: Սարքերն առաջին անգամ ամբողջ ծավալով կգործարկվեն խորհրդարանական ընտրությունների ժամանակ, որից հետո Երեւանի ավագանու, իսկ արդեն աշնանից` բոլոր ՏԻՄ ընտրություններում:
Սպասվում է, որ առաջիկա ընտրություններին մինչեւ 900 ընտրող ունեցող տեղամասերում կտեղադրվեն 1-ական սարքավորում, իսկ 900-ից ավելի ընտրողի դեպքում` 2 եւ ավելի: