Դեռեւս կոնկերտ պայմանավորվածություններ չկան Լեռնային Ղարաբաղի հակամարտության կարգավորման շրջանակներում Ռուսաստանի, Հայաստանի եւ Ադրբեջանի ԱԳ նախարարների հնարավոր հանդիպման վերաբերյալ, բայց Երեւանը միշտ պատրաստ է նման հանդիպումներին մասնակցելուն: Այս մասին «ՌԻԱ Նովոստի»-ի հետ հարցազրույցում հայտարարել է Հայաստանի ԱԳ նախարար Էդվարդ Նալբանդյանը:
«Լեռնային Ղարաբաղի հակամարտության կարգավորման շրջանակներում Ռուսաստանի, Հայաստանի եւ Ադրբեջանի ԱԳ նախարարների հանդիպման վերաբերյալ դեռեւս կոնկերտ պայմանավորվածություններ չկան: Մի քանի օր առաջ անցկացված անվտանգության հարցերով Մյունխենի համաժողովի շրջանակներում հանդիպել եմ ԵԱՀԿ Մինսկի խմբի համանախագահների հետ, ինչպես նաեւ Ադրբեջանի ԱԳ նախարարի հետ: Մենք մշտապես ասել ենք, որ հանդիպումներին պատրաստ ենք: Եթե հանդիպումներ չեն լինում, ապա դա մեր մեղքով չէ»,- ասել է նախարարը:
Նրա խոսքով՝ համանախագահների հետ իր հանդիպման ժամանակ որոշվել է շարունակել ջանքեր գործադրել խաղաղ գործընթացի առաջմղման անհրաժեշտ պայմանների ստեղծման համար: «Այդ նպատակով համանախագահները պատրաստվում են առաջիկա շաբաթներին այցելել տարածաշրջան»,- հավելել է Նալբանդյանը:
