Վիեննայում դատարանը որոշել է չկալանավորել ուկրաինացի գործարար Դմիտրի Ֆիրտաշին, որին ավելի վաղ ձերբակալել էին Իսպանիայի խնդրանքով։ ՌԲԿ-ին Ֆիրտաշի ներկայացուցիչ Եվգենի Սմագլյուկը հայտնել է, որ Վիեննայի քրեական գործերով դատարանը, քննելով Իսպանիայի հարցումը, որոշում է կայացրել ազատ արձակել Դմիտրի Ֆիրտաշին՝ առանց լրացուցիչ գրավի։
Գործարարի փաստաբանների խոսքով դատարանը Ֆիրտաշին կալանավորելու հարցում դատախազին մերժել է «քանի որ դատարանի պահանջով նրա չներկայանալու ռիսկ չկա» ։ Նրան արգելել են լքել Ավստրիայի տարածքը, նա դատարանին է հանձնել իր արտասահմանյան անձնագիրը։
Իսկ դատավորի ներկայացուցիչ Կրիստինա Զալցբորնը հայտնել է, որ մոտ օրերս կքննվի գործարարին ԱՄՆ արտահանձնելու հարցը։
ԱՄՆ-ում Ֆիրտաշին կասկածում են Հնդկաստանում չինովնիկներին կաշառելու մեջ՝ տիտան պարունակող հանքանյութեր արդյունահանելու արտոնագիր ստանալու նպատակով։ 2014-ին ամերիկացիները նրա արտահանձնման համար հարցում էին ուղարկել, սական Վիեննայի դատարանը մերժել էր ԱՄՆ-ին։