Վազգեն Սարգսյանի անվան ռազմական ինստիտուտի կուրսանտ Հայկազ Բարսեղյանի սպանության գործով դատական նիստին այսօր՝ փետրվարի 27-ին, հարցաքննվեց Վազգեն Սարգսյանի անվան ռազմական ինստիտուտի կուրսանտ Հարություն Բալդերյանը: Նա նշեց, որ ճանաչում է եւ գործով ամբաստանյալներին, եւ սպանված կուրսանտին, նրա խոսքով` բոլորի հետ նորմալ հարաբերությունների մեջ է եղել: Կուրսանտի խոսքով` Հայկազ Բարսեղյանի սպանության մասին տեղեկացել է առավոտյան` վերակացից հետո: Իսկ դեպքի օրը գիշերը «հաց են կերել», որի ընթացքում էլ շնորհավորել են գործով ամբաստանյալ Վաչե Սահակյանի ծնունդը եւ օգտագործել ոգելից խմիչք:
«7 հոգով կապտյորկայում հաց ենք կերել` Վարազդատը Սաֆարյանը, Վաչեն, Մովսեսը, Մանուկյան էդուարդը, Պողոսյան Դավիթը, Վահանյան Արթուրը: Սահակյան Վաչեի ծնունդն էր մի քանի օր առաջ, ձեռի հետ էլ շնորհավորել ենք, օգտագործել ենք ոգելից խմիչք` մարդա երկու բաժակ խմել ենք: Այդ օրը ես նաեւ երրորդ հարկ եմ բարձրացել, Հայկազ Բարսեղյանին չեմ տեսել: Հետո բոլորով գնացել ենք քնելու»,-պատմեց նա:
Նա բնութագրելով գործով ամբաստանյալներին` նշեց, որ Մովսես Ազարյանը եւ Վաչե Սահակյանը նորմալ տպավորություն են թողել, իսկ Նորիկ Սահակյանի եւ Գնել Թեւոսյանի հետ չի շփվել եւ չի կարող որեւիցե բան ասել:
«Իրենց հետ ես շփում չեմ ունեցել, որ իջնում էիք ծխելու, էդ ժամանակ ենք շփվել: Մովսեսը, Վաչեն նորմալ տպավորություն են թողել, ոչ մի ագրեսիվ բան չեմ նկատել, Նորիկի վերաբերյալ բան չեմ կարա ասեմ, որովհետեւ շփում չի եղել: Վարազդատն էլ շատ լավ տպավորություն ա թողել, իր հետ մոտիկից շփում եղել ա: Չորսով նորմալ հարաբերությունների մեջ են եղել ամբաստանյալները, ոչ մի ագրեսիվ պահվածք չեմ տեսել: Իսկ Հայկազ Բարսեղյանի մասին լսել եմ, որ լավ ա սովորել, շնորհքով տղա ա եղել, բայց իրա հետ էլ շփում չի եղել»,-ասաց նա:
Դատարանը գտավ, որ Հարություն Բալդերյանի նախաքննական ցուցմունքի եւ դատավարության ընթացքում տված ցուցմունքի միջեւ հակասություններ կան եւ անհրաժեշտ է հրապարակել նրա նախաքննական ցուցմունքը:
Նախաքննական ցուցմունքում նա նշել է, որ 2015թ. հունվարի 28-ին հավքվել են մարտկոցի պահասենյակում, որեսզի շնորհավորեն գործով ամբաստանյալ Վաչե Սահակյանի ծնունդը:
«00:40-ի սահմանում ենք հավաքվել, ոգելից խմիչքի գնելու միտքը եղել է Վարազդատ Սաֆարյանի միտքը, իսկ գումարն ես եմ տվել, պաhասենյակում ծնունդ նշելու միտքն էլ եղել է Վաչեինը: Օղի ենք խմել, վերջում Վանյան Արթուրից ու ինձնից բացի բոլորը դուրս են եկել, գնացել ենք ծխելու եւ քնելու»,-ասել է նա:
Կուրսատնքի խոսքով, սպանության օրն առավոտյան Դավիթ Պողոսյանի բղավոցն է լսել, նա գոռացել է, որ Հայկազ Բարսեղյանի անկողինը ամբողջությամբ արյուն է, ավելի ուշ նրան հայտնաբերել են կախված վիճակում: Նա ասել է, որ դեպքի նախորդ օրը լսել է, որ Վաչեն եւ Հայկազը վիճաբանել են միմյանց հետ:
Հայկազ Բարսեղյանի սպանության համար մեղադրվում են նրա համակուրսեցիները` կուրսանտներ Գնել Թեւոսյանը, Նորիկ Սահակյանը, Վաչե Սահակյանը եւ Մովսես Ազարյանը։ Ըստ մեղադրանքի՝ նրանք 2015թ. հունվարի 29-ին՝ ժամը 02:00-ից 03:00-ի սահմանում, զորամասի ննջարանում դաժանությամբ սպանել են կուրսանտ Հայկազ Բարսեղյանին, ապա հետքերը թաքցնելու նպատակով կախել նրա մարմինը մարզահրապարակում գտնվող պտտաձողից, նրա անունից գրություն թողել, թե իբր ինքնասպան է եղել: Ամբաստանյալներն իրենց մեղավոր չեն ճանաչում: