Ռուսաստանի կառավարությունը կշարունակի աջակցել Հայաստանում դպրոցական սննդի ծրագրին։ Մարտի 16-ին Հայաստանում ՄԱԿ-ի պարենամթերքի ու գյուղատնտեսության կազմակերպության (FAO) ներկայացուցիչ Ռայմունդ Ելլեն լրագրողներին ասել է, որ այդ ծրագրի համար կհատկացվի 6 մլն դոլար, այն կիրականացվի 3 տարի 3 երկրներում՝ Հայաստանում, Ղրղզստանում ու Տաջիկստանում։
Ծրագիրը ներառելու է նաեւ անմիջական աջակցություն դպրոցական սննդին ու հավասարակշռված սննդակարգի մասին իրազեկում։
ՄԱԿ-ի մեկ այլ՝ Համաշխարհային պարենամթերային ծրագրով (WFP), Ռուսաստանի կառավարությունը դեռ 2010-ից սկսած աջակցումէ Հայաստանում դպրոցական սննդի ծրագրին։ 6 տարվա ընթացքում Մոսկվան Երեւանին տրամադրել է 24․7 մլն դոլար; Այդ միջոցներով սնունդ է կազմակերպվել 10 մարզերից 7-ում։ Հայաստանի կառավարությունը ստանձնել է մյուս 3 մարզերի՝ Արարատի, ՎԱյոց ձորի ու Սյունիքի մարզերի դպրոցական սննդի կազմակերպումը։ Այդ նպատակով կառավարությունը հատկացնում է տարեկան մոտ 500 մլն դրամ ։
