«Սամվել Բաբայանին ես ոչ ճանաչում եմ, ոչ էլ հետը ընկերություն եմ արել»: Այս մասին այսօր` մարտի 23-ին, Շենգավիթ վարչական շրջանում ընտրողների հետ հանդիպման ավարտին, լրագրողների հետ զրույցում հայտարարեց Երեւանի քաղաքապետ Տարոն Մարգարյանը:
Նրա խոսքով` ինքը ոչինչ չի կարող ասել Արցախի պաշտպանության նախկին նախարար Սամվել Բաբայանի մասին, քանի որ նրա հետ ընկերություն չի արել:
«ԱԱԾ-ն է ձերբակալել, եւ իր հայտարարության մեջ ասել է,թե ինչի համար, հստակ հոդվածները նշել է: Նրանք են մասնագիտացված այդ հարցում եւ հենց իրենց էլ պետք է հարցնել, թե արդյոք հնարավոր է «ԻԳԼԱ» բերել Հայաստան, թե ոչ: Ես նրան չեմ ճանաչում: Ոչ անձնապես եմ ճանաչում, ոչ խորապես ուսումնասիրել եմ իր գործունեության մասին: Նրա հետ ոչ շփվել եմ, ոչ էլ ընկերություն եմ արել»,-ասաց քաղաքապետը:
Վարչապետ Կարեն Կարապետյանն էլ հարցին, թե արդյոք Սամվել Բաբայանը քաղաքական ճնշումների պատճառով է ձերբակալվել, պատասխանեց.«Դե սպասեք, թող իրավապահները հասկանան, պատասխանեն»:
Ըստ ԱԱԾ մամուլի կենտրոնի հաղորդագրության՝ մաքսանենգ եղանակով Հայաստանի Հանրապետություն «Իգլա» տեսակի զենիթա-հրթիռային համալիր տեղափոխելու փաստի առթիվ հարուցված քրեական գործի շրջանակներում այս պահին ձերբակալված են 3 անձ, այդ թվում՝ ՀՀ քաղաքացի Սամվել Բաբայանը:
Կատարված քննչական գործողությունների եւ օպերատիվ-հետախուզական միջոցառումների արդյունքում ստացվել են նաեւ արժանահավատ տվյալներ, որ նշված զենիթա-հրթիռային համալիրի բաղկացուցիչ մասերի ձեռքբերումը եւ փոխադրումն իրականացրած անձինք գործել են Սամվել Բաբայանի հետ ունեցած նախնական համաձայնությամբ եւ նրա պատվերով:
Սամվել Բաբայանի ձերբակալությունը «Օհանյան-Րաֆֆի-Օսկանյան» դաշինքը որակում է որպես քաղաքական հետապնդում: Նշենք, որ Սամվել Բաբայանը երբեք չի հերքել իր կապն այդ դաշինքի հետ: