Հայաստանում հարցման մասնակիցների 82.2 տոկոսը կցանկային Կարեն Կարապետյանին տեսնել երկրի վարչապետի պաշտոնում նաեւ 2017-ի խորհրդարանական ընտրություններից հետո։ Այս մասին մարտի 24-ին մամուլի ասուլիսի ժամանակ հայտնել է Հայաստանում Gallup International Association-ի ներկայացուցչության ղեկավար Արամ Նավասարդյանը՝ ներկայացնելով քաղաքական կուսակցությունների ու դաշինքների ցուցանիշները՝ ըստ նախընտրական սոցիոլոգիական հարցման արդյունքների, որը տեղի է ունեցել մարտի 12-19-ը՝ ՀՀ 10 մարզում եւ Երեւանի բոլոր շրջաններում։
Նրա խոսքով՝ դա բավականին մեծ ցուցանիշ է։ «Այն հարցին, թե արդյոք կցանկանայիք, որ 2017-ի խորհրդարանական ընտրություններից հետո Կարեն Կարապետյանը մնա երկրի վարչապետի պաշտոնում, հարցման ենթարկվածների 34,8 տոկոսը պատասխանել են «միանշանակ՝ այո», 48 տոկոսը՝ «ամենայն հավանականությամբ՝ այո», 6,9 տոկոսը՝ «ամենայն հավանականությամբ՝ ոչ», 4,8 տոկոսը՝ «միանշանակ՝ ոչ»։ Եւ դժվարացել են պատասխանել 5,4 տոկոսը»,-նշել է Նավասարդյանը։