ՀՀ տրանսպորտի, կապի եւ տեղեկատվական տեխնոլոգիաների նախարար Վահան Մարտիրոսյանը Բուլղարիայի մայրաքաղաք Սոֆիայում «Տրանսպորտային ոլորտի ներդրումային հնարավորություններ» խորագրով տարածաշրջանային համաժողովի եւ Արեւելյան գործընկեր երկրների նախարարական նիստի ժամանակ ներկայացրել է Հայաստանում իրականացվող տրանսպորտային ենթակառուցվածքային ծրագրերը:
Նախարարությունից NEWS.am-ին հայտնում են, որ Համաժողովի ժամանակ ելույթ է ունեցել ՀՀ տրանսպորտի, կապի եւ տեղեկատվական տեխնոլոգիաների նախարար Վահան Մարտիրոսյանը: Նա ներկայացրել է Հայաստանում իրականացվող տրանսպորտային ենթակառուցվածքային ծրագրերը, ինչպես նաեւ ֆինանսական աջակցության կարիք ունեցող նոր նախագծեր, դրանցում կարեւորել պետություն - մասնավոր հատված համագործակցությունը:
Համաժողովին մասնակցել են նաեւ ԵՄ անդամ-պետությունների, Արեւմտյան Բալկանների եւ Արեւելյան հարեւանության երկրների նախարարներ, Եվրոպական հանձնաժողովի, Եվրոպական ներդրումային, Համաշխարհային եւ Եվրոպական վերակառուցման եւ զարգացման բանկերի, միջազգային ֆինանսական հաստատությունների բարձրաստիճան ներկայացուցիչներ, փորձագետներ, նախագծերի ներկայացուցիչներ, ներդրողներ, եւ այլ շահագրգիռ կողմեր:
Եվրոպական հանձնաժողովի կողմից կազմակերպված տարածաշրջանային ներդրումային համաժողովը նվիրված է տրանսպորտի ոլորտում ներդրումային մակարդակների կայուն զարգացմանը:
