«Սարի թաղի» բախումների գործով մեղադրյալ Էդուարդ Զեյթունյանն այսօր՝ մարտի 24-ին, հացադուլ է հայտարարել: Այս մասին NEWS.am-ին ասաց նրա կինը՝ Լալա Բեռնեցյանը՝ նշելով, որ այդ մասին տեղեկացել է ամուսնուց, երբ նրան այցի էր գնացել:

«Ամուսինս հացադուլի միջոցով իր դժգոհությունն է հայտնում իրեն առաջադրված մեղադրանքի վերաբերյալ: Էդուարդի առողջական վիճակը լավ չէ, նա շատ գունատ էր եւ հյուծված»,- ասաց Լալա Բեռնեցյանը:

Հիշեցնենք, որ ըստ մեղադրական եզրակացության՝ Սարի թաղի բնակիչներ Հարություն Թորոսյանը, Հրայր Իսախանյանը, Անդրանիկ Քյոսեյանն ու Էդուարդ Զեյթունյանը 2016թ. հուլիսի 19-ին ժամը 20.00-ի սահմանում Մովսես Խորենացի փողոցին հարող` Գլինկա եւ Որմնադիրների փողոցների հատման վայրում մի խումբ անձանց հետ, առողջության համար վտանգավոր բռնություն են գործադրել իրենց ծառայողական պարտականությունները կատարող, իշխանության ներկայացուցիչ համարվող ՀՀ ոստիկանության մի շարք ծառայողների նկատմամբ: Նրանց մեղադրանք է առաջադրվել Քրեական օրենսգրքի 316-րդ հոդվածի 2-րդ մասով: Բոլորն էլ կալանավորված են: Կալանավորվածների հարազատները մինչդեռ պնդում են՝ նրանք ընդամենը պահանջել են, որ իրենց հոսանքն ու ջուրը միացնեն, բացեն փակ ճանապարհները։