Լոռու մարզում «Օհանյան-Րաֆֆի-Օսկանյան» դաշինքի նախընտրական քարոզարշավին Ստեփանավանում այսօր՝ մարտի 24-ին միացավ «Ժառանգություն» կուսակցության առաջնորդ Րաֆֆի Հովհաննիսյանը։ Հանդիպումը կայացավ քաղաքի մշակույթի տանը։
Ելույթ ունենալով՝ նա նշեց՝ ընտրվելու դեպքում առաջին գործերից մեկը լինելու է ստվերը օրինական դաշտ բերելը եւ դրա հաշվին աշխատավարձերի բարձրացումն ու նոր աշխատատեղերի ստեղծումը։ Վերջինս ստեփանավանցիներին կոչ արեց ապրիլի 2-ին քվեարկել ՕՐՕ-ի օգտին։
«Մեզ պետք են համարձակ, բարոյապես ազնիվ մարդիկ, որոնց համար գործից առավել ոչ ոք ու ոչինչ կարեւոր չէ»,-իր խոսքում նշեց դաշինքի ցուցակը գլխավորող, պաշտպանության նախկին նախարար Սեյրան Օհանյանը։ Հանդիպման ավարտին ստեփանավանցիներին հարցեր ուղղելու հնարավորություն տրվեց։ Ամբողջ դահլիճում սակայն հարցեր ուներ միայն Շալիկո պապը։
Նա Սեյրան Օհանյանին դիմեց. «Գիտե՞ք ինչն է մտահոգիչ մեր ժողովրդի համար։ Բազում հարցեր կան բազում հարցականներով, որովհետեւ այդ խոստումները եւ ձեր բերանից են հնչում, եւ մյուս կուսակցությունների թեկնածուների բերաններից, որքա՞ն տոկոսով իրականություն կդառնան։ Հավանական է՝ Դուք էլ չեք կարող ճշմարիտը ասել։ Համաձայնեք ինձ հետ»։
Ստեփանավանցու հաջորդ հարցը վերաբերում էր Սեյրան Օհանյանի պաշտպանության նախարար աշխատած տարիներին բանակում տիրող վիճակին։ «Դուք արդյոք չգիտեի՞ք, որ մեր Արցախի առաջնագծում իշխանավորի ոչ մի երեխա չի ծառայել»։
«Իմ ծառայության ընթացքում զինվորական ծառայության համալրման գործընթացը բերվել է մի այնպիսի մակարդակի, որ զորակոչի ընթացքում մենք բաշխումն իրականացրել ենք վիճակահանությամբ։ Եվ այդ վիճակահանությամբ բաշխման ընթացքում մանավանդ վերջին տարիները առաջնագծում հայտնվել են մարդիկ, որոնք իրականության մեջ նաեւ ներկայացնում են իշխանություն»։
Ինչ վերաբերում է հաջորդ հարցին,Օհանյանը նշեց. «Հինգ տարին մեկ խոստումներ տալուն վերաբերող հարցը կարող եք ուղղել այսօրվա գործող պատգամավորներին, նաեւ ձեր տարածաշրջանի պատգամավորներին։ Ես, որպես քաղաքական գործիչ, առաջին անգամ եմ ձեր մոտ»։
