Հայ-ռուսական մարդասիրական արձագանքման կենտրոնում կստեղծվի տվյալների միասնական բազա: Այսօր՝ մարտի 27-ին ՀՀ ԱԻ նախարար Դ. Տոնոյանն աշխատանքային այցով եղել է Կոտայքի մարզում տեղակայված Հայ-ռուսական մարդասիրական արձագանքման կենտրոնում, ինչպես նաեւ՝ մարզային ճգնաժամային կառավարման կենտրոնում, ՓԾ հատուկ նշանակության փրկարարական աշխատանքների իրականացման կենտրոնում եւ շնաբանական ծառայությունում:
ԱԻՆ-ից NEWS.am-ին հայտնում են, որ Հայ-ռուսական մարդասիրական արձագանքման կենտրոնում նախարար Դ. Տոնոյանը կենտրոնի ղեկավար կազմի հետ քննարկել է կազմակերպչական, գույքային ու տեխնիկական զինման հարցեր: Նախարարն ընգծել է մասշտաբային աղետների ժամանակ կենտրոնի դերն ու աշխատանքը տարածաշրջանային մակարդակով, քանի որ այն միակն է Հարավային Կովկասում: Դ. Տոնոյանը հանդիպեց նաեւ Հայ-ռուսական մարդասիրական արձագանքման կենտրոնում պարբերաբար վերապատրաստման դասընթացներ իրականացնող ՌԴ ԱԻՆ կենտրոնական փրկարարական ջոկատի փորձագետների հետ:
Հաջորդիվ լինելով Կոտայքի մարզային ճգնաժամային կառավարման կենտրոնում եւ ծանոթանալով դրա հնարավորություններին` ԱԻ նախարարը հանձնարարել է արդիականացնել կենտրոնի ծրագրային ապահովումը եւ ստեղծել տվյալների ընդհանուր բազա, որը կդառնա միասնական համակարգի հիմք:
ՓԾ հատուկ նշանակության փրկարարական աշխատանքների իրականացման կենտրոնում նախարար Դ. Տոնոյանը շփվել է անձնակազմի հետ, ծանոթացել ԻՆՍԱՐԱԳ-ի որակավորում ունեցող ՀՀ ԱԻՆ միջազգային առաքելությունների համար պատրաստված ջոկատներին եւ դրանց գույքին:
ՓԾ շնաբանական ծառայությունում ԱԻ նախարարը քննարկել է ծառայության զարգացման հեռանկարներն ու առկա խնդիրները: