Ապրիլի 22-ին «Երկիր ծիրանի» կուսակցության ներկայացուցիչները՝ Զարուհի Փոստանջյանի գլխավորությամբ, Երեւանի ավագանու ընտրությունների քարոզարշավի երկրորդ օրն անցկացրել են Մալաթիա-Սեբաստիա վարչական շրջանի գյուղատնտեսական շուկայի եւ հագուստի տոնավաճառի տարածքում:
Գյուղատնտեսական շուկայում ծանոթանալով առեւտրի անտանելի պայմաններին եւ լսելով այնտեղ աշխատողների բողոքները (առեւտրի 2 օբյեկտներն էլ գործում են երկար տարիներ – խմբ.), Երեւանի քաղաքապետի թեկնածու Զարուհի Փոստանջյանն ընդգծեց. «Շուկաներում առեւտուրն, իհարկե, փոփոխության կարիք ունի եւ պետք է համակարգային վերանայման ենթարկվի: Համակարգային վերանայումն այնպիսի գործառույթներ է նախատեսում, որ ոչ մի աշխատատեղ չփակվի, քանի որ այն վայրի մեթոդները, որոնք փողոցային առեւտրով զբաղվող մարդկանց նկատմամբ կիրառվել են, անթույլատրելի են: Առաջին հերթին պետք է հաշվի առնվեն մանրածախ առեւտրի ներկայացուցիչների իրավունքները եւ շահերը»:
NEWS.am-ի հետ զրույցում անդրադառնալով առաջիկա ընտրություններում կուսակցության հնարավորություններին՝ Զարուհի Փոստանջյանը նշեց. «Մենք գնում ենք քաղաքապետարանն ազատագրելու կոռուպցիայից, կեղտից, անբարոյությունից, անարդարությունից»:
Հարցին՝ իր կարծիքով, կուսակցությունը քանի ձայն կստանա նշված բարձր նպատակն իրականացնելու համար, Փոստանջյանը շեշտեց. «Մենք կգրավենք քաղաքապետարանը: Հետեւաբար՝ ստացած ձայները դուք կտեսնենք արդեն այն գրավելու պահին: Մենք մրցակիցներ չունենք, մենք մեկ թիրախ ունենք՝ դա Հանրապետական կուսակցությունն է»:
Հիշեցնենք, որ Երեւանի ավագանու ընտրությունները տեղի կունենան մայիսի 14-ին: Ընտրություններին կմասնակցեն երեք քաղաքական ուժեր՝ իշխող Հանրապետական կուսակցությունը, «Ելք» դաշինքը եւ «Երկիր ծիրանի» կուսակցությունը: ՀՀԿ-ի համամասնական ցուցակը գլխավորում է գործող քաղաքապետ Տարոն Մարգարյանը, «Ելք» դաշինքինը՝ Նիկոլ Փաշինյանը:
